အမျိုးသား လျှပ်စစ်ဓာတ်အား ရရှိရေးစီမံကိန်း ကြန့်ကြာနေရခြင်းမှာ ချေးငွေရရှိရန် လုပ်ငန်းအဆင့်ဆင့် ဆောင်ရွက်နေရခြင်းကြောင့် ဟုဆို

Share it:
ရန်ကုန်၊ ဇွန် ၇

အမျိုးသားလျှပ်စစ်ဓာတ်အားရရှိရေးစီမံကိန်း ကြန့်ကြာနေရခြင်းမှာ ချေးငွေရရှိရန် လုပ်ငန်းအဆင့်ဆင့်ဆောင်ရွက်နေရခြင်းကြောင့်ဖြစ်ကြောင်း လျှပ်စစ်နှင့် စွမ်းအင်ဝန်ကြီးဌာန ဒုတိယဝန်ကြီး ဒေါက်တာထွန်းနိုင်က ပြောသည်။ မဟာဓာတ်အားလိုင်းမှ နှစ်မိုင်ဝန်းကျင် ကျေးရွာ ၅ဝဝဝ ကျော်နှင့် ငါးမိုင်ဝန်းကျင် ကျေးရွာ ၇ဝဝဝ ကျော်လျှပ်စစ်ဓာတ်အားရရှိမည့် အဆိုပါစီမံကိန်းနှင့်ပတ်သက်၍ ဇွန် ၇ ရက်တွင်ပြုလုပ်သော ပြည် ထောင်စုလွှတ်တော်အစည်းအဝေးတွင် ၎င်းကပြောခဲ့ခြင်းဖြစ်သည်။

''ချေးငွေသဘောတူစာချုပ်ချုပ်ဆိုပြီးတာနဲ့ ချေးငွေရသွားပြီလို့ ယူဆတတ်ပါတယ်။ တကယ်တော့ ချေးငွေစာချုပ်ချုပ်ဆိုပြီးချိန်မှာ စာချုပ်အသက်ဝင်ဖို့ အရင်ဆုံးလုပ် ရပါတယ်။ အဲဒီအသက်ဝင်အောင်လုပ်တဲ့ လုပ်ငန်းစဉ်ပြီးရင် အကြံ ပေးလုပ်ငန်းတွေ၊ ကန်ထရိုက်တာ ခေါ်ယူတာတွေ  အကြမ်းဖျင်း ခြောက်ဆင့်ရှိပါ တယ်''ဟု ၎င်းက ပြောသည်။


အဆိုပါအဆင့်များကိုဆောင်ရွက်ရာတွင် အချိန်များစွာယူရ ကြောင်း၊ အတိုင်ပင်ခံအကြံပေး ငှားရမ်းရာတွင် လည်း သက်ဆိုင်ရာလုပ်ထုံးလုပ်နည်း အဆင့်ဆင့် ဖြတ်သန်းရသဖြင့် တစ်နှစ်ခွဲကျော် ကြာမြင့်ကြောင်း၊ အဆင့်များစွာရှိကြောင်း၊ စီမံကိန်းစတင် ရန်ဆွေးနွေးခြင်းကို ၂ဝ၁၄ ခုနှစ် မတ်လကစတင်ခဲ့ကြောင်း၊ ချေးငွေ လျှောက်ထားခြင်းနှင့် ပြည်ထောင်စု လွှတ်တော်အတည်ပြုချက်ရယူ ခြင်းစသည့်အဆင့်ဆင့်ကို ၂ဝ၁၅ ခုနှစ် မတ်လထိ တစ်နှစ်ကြာမြင့်ခဲ့ ကြောင်း၊ ချေးငွေအသက်ဝင်ရန် ဆောင်ရွက်ခြင်းမှာ ၂ဝ၁၅ ခုနှစ် ဇွန်လအတွင်းပြီးစီးခဲ့ကြောင်း၊ စာချုပ်ချုပ်နိုင်ခဲ့သည်မှာ ၂ဝ၁၆ ခုနှစ် ဖေဖော်ဝါရီတွင်ဖြစ်ကြောင်း၊ တင်ဒါခေါ်ယူရန်ဆောင်ရွက်စဉ် JICA  မှ မူလလမ်းညွှန်ချက်တွင် မပါဝင်သည့် ၎င်းတို့စမ်းသပ်သည့် မူသစ်ဖြင့်ခေါ်ယူရန် ချထားပေးခဲ့ ကြောင်း၊ ယင်းမူသစ်ကြောင့် JICA နှင့် အကြိမ်ကြိမ်ဆွေးနွေးခဲ့ရပြီး ကန်ထရိုက်တာခေါ်ယူခြင်းကို ၂ဝ၁၈ ခုနှစ် ဧပြီတွင်မှပြုလုပ်နိုင်ခဲ့ ကြောင်း၊ လာမည့်ဇူလိုင်တွင်မှ တင်ဒါပိတ်နိုင်မည်ဖြစ်ကြောင်း ဝန်ကြီးက ရှင်းပြသည်။
ရန်ကုန်တိုင်းဒေသကြီး မဲဆန္ဒနယ်အမှတ်(၄)မှ အမျိုးသားလွှတ်တော်ကိုယ်စားလှယ် ဦးသန်းစိုးက ဝန်ကြီးဌာနများ၏ ချေးငွေ စီမံကိန်းအားလုံးသည် နှောင့်နှေး ကြန့်ကြာမှုများတွေ့ရှိရသဖြင့် အစိုးရ၏လုပ်ရည်ကိုင်ရည်အပေါ်တွင် ယုံကြည်မှု၊ ရင်းနှီးမြှုပ်နှံမှု ဆိုင်ရာယုံကြည်မှုများလျော့နည်း လာမည်ကိုစိုးရိမ်ကြောင်း၊ စီမံကိန်းအများအပြားသည် ရာခိုင်နှုန်း ၅ဝ သာပြီးစီးသည်ကိုတွေ့ရ ကြောင်း၊ သီးခြားကော်မရှင်တစ် ရပ်ဖွဲ့စည်းကာစစ်ဆေးသင့်ကြောင်း ဇွန် ၅ ရက် ပြည်ထောင်စုလွှတ် တော်အစည်းအဝေးတွင် တင်ပြခဲ့သည်။


''ကျေးရွာသူရွာသားများဟာ မရှိမဲ့ရှိမဲ့ငွေဖြင့်လည်းကောင်း၊ ငွေ ချေးငှား၍လည်းကောင်း လျှပ်စစ်မီးရချင်လွန်းလို့လုပ်ဆောင်ခဲ့ကြောင်း လေ့လာတွေ့ရှိရပါတယ်။ စောင့်ဆိုင်းရတဲ့ကာလကြာမြင့်လာတဲ့အခါ ဒီအစိုင်အခဲတွေဟာ ဘေး ပယောဂတွေဟာ NLD အစိုးရဟာ ဘာမှမလုပ်တတ်ဘူးဆိုတဲ့ သွားပုပ်လေလွင့်ပြောကြားမှု၊ သွေးထိုးခံရမူဟာ မကြာခဏဆိုသလို ကြားနေရပါတယ်''ဟု မကွေးတိုင်းဒေသကြီး အမှတ်(၆) မဲဆန္ဒနယ်အမျိုးသားလွှတ်တော်ကိုယ်စားလှယ်ဦးဝင်းမောင်ကပြောသည်။ အမျိုးသားလျှပ်စစ်ဓာတ် အားရရှိမှုစီမံကိန်း နှောင့်နှေးကြန့် ကြာနေခြင်းကြောင့် ပြည်သူများ လျှပ်စစ်မီးတိုင်များကိုကိုယ်ထူ ကိုယ်ထစိုက်ထူရကာ ဝန်ပိလျက်ရှိကြောင်း၊ ကြိုးမတပ်ရသေးသည့် ထရန်စဖော်မာများ၊ ကြိုးမလဲရ သေးသည့်ဓာတ်အားလိုင်းများရှိ နေသေးကြောင်း၊ ယခုအထိ လျှပ်စစ်မီးစောင့်ဆိုင်းနေရသည့် ကျေးရွာအများအပြား ကျန်ရှိနေသေး ကြောင်း လွှတ်တော်ကိုယ်စားလှယ်အချို့က ဆွေးနွေးခဲ့သည်။

NT

#democracytoday

Ref : https://www.yangonmedia.com
Share it:

News

Political

Regional

Post A Comment: