ဒေါ်အောင်ဆန်းစုကြည်နေရာကို ဆက်ခံမည့်သူ

Share it:


“အန်တီ (ဒေါ်အောင်ဆန်းစုကြည်) ရဲ့ ကျန်းမာရေးဟာ နိုင်ငံတော်ရဲ့ ကျန်းမာရေးပါ”

ကြိုက်သူ၊ မကြိုက်သူ၊ ဘာသိဘာသာနေသူဟု ကွဲပြားမည်ဖြစ်သော်လည်း ယနေ့မြန်မာနိုင်ငံတွင် ဒေါ်အောင်ဆန်းစုကြည်သည် အရေးအကြီးဆုံးပုဂ္ဂိုလ်ဖြစ်နေသည်ဟု ဝါရင့်နိုင်ငံရေးသမား ဦးကိုကိုကြီးက ဆိုလိုက်ခြင်းဖြစ်သည်။

သင်္ချာဆန်ဆန် ပုံသေနည်းဆွဲကြည့်ပါက ဒေါ်အောင်ဆန်းစုကြည်၏ ကျန်းမာရေးသည် နိုင်ငံ၏ကျန်းမာရေးဖြစ်သည်။ ထို့ကြောင့် ဒေါ်အောင်ဆန်းစုကြည်သည်ပင်လျှင် နိုင်ငံ။

နိုင်ငံတစ်နိုင်ငံသည် ပုဂ္ဂိုလ်တစ်ဦးနှင့် ညီမျှခြင်းဆွဲရလောက်အောင် ထိုပုဂ္ဂိုလ်သည် နိုင်ငံအတွက် အရေးကြီးနေလျှင် ထိုပုဂ္ဂိုလ်သည် သူ့သဘောဆန္ဒအရသော်လည်းကောင်း၊ အခြားအကြောင်းတစ်ခုခုကြောင့်သော်လည်းကောင်း နိုင်ငံရေးတွင် ပါဝင်ခြင်းမရှိတော့လျှင် မည်သူ သူ့နေရာကို အစားဝင်မည်နည်းဟူသော မေးခွန်းကို ကြိုတင်စဉ်းစားထားရန်လိုသည်။

ထိုမေးခွန်းသည် သက်ဆိုင်ရာ အစိုးရ၊ ပါတီတို့နှင့် သက်ဆိုင်သည့်နည်းတူ သာမန်နိုင်ငံသူနိုင်ငံသားများ၊ ထိုနိုင်ငံတွင် ရင်းနှီးမြှုပ်နှံထားသော နိုင်ငံခြားသားရင်းနှီးမြှုပ်နှံသူများအတွက်ပါ အရေးကြီးသည်။

ထိုမေးခွန်းကို မစဉ်းစားမီ ဒေါ်အောင်ဆန်းစုကြည်၏နေရာများကို ဦးစွာအစီအစဉ် ချကြည့်မည်။

မြန်မာနိုင်ငံသည် ဒေါ်အောင်ဆန်းစုကြည် ဖြစ်ရလောက်အောင် ဒေါ်အောင်ဆန်းစုကြည်သည် မြန်မာနိုင်ငံရေးတွင် အဓိကကျသောနေရာတွင် ရောက်ရှိနေသည်။ အတိုက်အခံနိုင်ငံရေးကို ၁၉၈၉ ခုနှစ်မှ စတင်ဦးဆောင်ခဲ့ပြီး ယခုအချိန်တွင် အစိုးရအဖွဲ့၏ ခေါင်းဆောင်ဖြစ်နေသည်။ ၂၀၁၅ ရွေးကောက်ပွဲတွင် မဲအပြတ်အသတ်နှင့် အနိုင်ရခဲ့ရာတွင် အဓိကမဲဆွယ်သူ Campaigner-in-chief မှာ ဒေါ်အောင်ဆန်းစုကြည်ဖြစ်သည်။

နိုင်ငံလည်ပတ်နေသော အခြေခံဥပဒတွင်မပါဝင်သည့် နိုင်ငံတော်၏ အတိုင်ပင်ခံပုဂ္ဂိုလ်နေရာကို ရယူနိုင်ခဲ့ခြင်းကိုက ဒေါ်အောင်ဆန်းစုကြည်၏ အာဏာနှင့် ဩဇာကို သက်သေပြသည်။ မြန်မာတို့၏ အမျိုးသားဖခင်ကြီးဖြစ်သော ဗိုလ်ချုပ်အောင်ဆန်း၏ သွေးသားရင်းချာသမီးလည်းဖြစ်သည်။ မြန်မာနိုင်ငံကို နိုင်ငံတကာတွင် ကိုယ်စားပြုနေသော အစိုးရ၏ခေါင်းဆောင်လည်းဖြစ်သည်။

ဒေါ်အောင်ဆန်းစုကြည် အာဏာရလာခြင်းသည် မြန်မာ့ဒီမိုကရေစီ နောက်တစ်ဆင့် လှမ်းတက်ခြင်းဟုလည်း တင်စားကြသည်။


စင်စစ် လက်ရှိဒေါ်အောင်ဆန်းစုကြည်၏ အရေးကြီးဆုံးနေရာမှာ အနည်းဆုံးအားဖြင့် သုံးနေရာဖြစ်သည်။ အစိုးရခေါင်းဆောင်၊ အာဏာရပါတီခေါင်းဆောင်၊ ဒီမိုကရေစီခေါင်းဆောင်။

အစိုးရအဖွဲ့တွင် အင်္ဂါစဉ်အရ ဒေါ်အောင်ဆန်းစုကြည်သည် နံပါတ်စဉ် ၂ တွင်ရှိသော်လည်း သမ္မတနှစ်ဦးလုံးကို သူက ခန့်သည်။ သမ္မတနှစ်ဦးလုံးကလည်း ဒေါ်အောင်ဆန်းစုကြည်အပေါ် သူတို့သဘောထားကို ထုတ်ပြောခဲ့ပြီးဖြစ်သည်။

လက်ရှိသမ္မတဖြစ်သူ ဦးဝင်းမြင့်သည် ဒေါ်အောင်ဆန်းစုကြည်ကို ပါတီခေါင်းဆောင်တစ်ဦးအဖြစ်သာမက ပုဂ္ဂိုလ်ရေးအရပါ လေးစားသူဖြစ်သည်။

ယင်းကိုထင်ရှားစေသည့် အချက်တစ်ချက်က ၂၀၁၆ ခုနှစ်အတွင်း ဖြစ်ပေါ်ခဲ့ဖူးသည်။

၎င်းအနေနှင့် လွှတ်တော်ဥက္ကဋ္ဌအဖြစ် တာဝန်ယူထားချိန်၊ ဒေါ်အောင်ဆန်းစုကြည်က လွှတ်တော်ကိုယ်စားလှယ်အဖြစ်သာရှိနေသေးပြီး အစိုးရအဖွဲ့ဝင်ရာထူးများ မရယူမီအချိန်ဖြစ်သည်။

လွှတ်တော်ဥက္ကဋ္ဌအဖြစ်နှင့် စင်မြင့်ထက်က ဥက္ကဋ္ဌထိုင်ခုံတွင် ထိုင်နေရပြီး အစည်းအဝေးများကို ဦးဝင်းမြင့်က ဦးဆောင်ကျင်းပနေရသည်။ ဒေါ်အောင်ဆန်းစုကြည်က ခန်းမအတွင်းမှ သာမန် လွှတ်တော်ကိုယ်စားလှယ်ထိုင်ခုံတွင် ထိုင်နေရသည်။

အဆိုပါ အနေအထားကို ဦးဝင်းမြင့်က စိတ်မလုံ။

ယင်းကြောင့်ပင် ဒေါ်အောင်ဆန်းစုကြည်ကို လွှတ်တော်အစည်းအဝေးများ မတက်တော့ရန် ဦးဝင်းမြင့်က တောင်းပန်ခဲ့သည်။

ဒေါ်အောင်ဆန်းစုကြည်သည် အာဏာရပါတီတည်ထောင်သူနှင့် ဥက္ကဋ္ဌဖြစ်သည်။ ဒေါ်အောင်ဆန်းစုကြည် အကျယ်ချုပ်ကျနေစဉ်သည် NLD ပါတီ အားအနည်းဆုံးအချိန်ဖြစ်သည်။ ဒေါ်အောင်ဆန်းစုကြည်သည် မြန်မာ့ဒီမိုကရေစီလှုပ်ရှားမှု၏ မီးရှူးတန်ဆောင် Icon ဖြစ်သည်။

ဒေါ်အောင်ဆန်းစုကြည်သည် အိန္ဒိယမှ ဆိုနီရာ ဂန္ဓီစတိုင် မန်မိုဟန်ဆင်းကို ဝန်ကြီးချုပ်နေရာပေးပြီး သူက ပါတီဥက္ကဋ္ဌနေရာတွင်နေသင့်သည်ဟု တိုက်တွန်း ထင်ကြေးပေးသူများ ပြည်ပရော ပြည်တွင်းတွင်ပါ ရှိခဲ့သည်။

ဦးထင်ကျော်ကို သမ္မတအဖြစ် ခန့်အပ်ခဲ့သော်လည်း ဒေါ်အောင်ဆန်းစုကြည်၏ အစိုးရခေါင်းဆောင်နေရာကို သေချာစေရန် နိုင်ငံတော်၏ အတိုင်ပင်ခံပုဂ္ဂိုလ်ဟူသောရာထူးကိုတီထွင်ခဲ့ရုံမက နိုင်ငံခြားရေးဝန်ကြီး၊ သမ္မတရုံးဝန်ကြီးတို့ကိုပါ ရယူထားခဲ့ရသည်။

၂၀၀၈ အခြေခံဥပဒေကြောင့် သမ္မတမဖြစ်နိုင်ခဲ့သော်လည်း အစိုးရ၏ ဦးစီးပဲ့ကိုင်နေရာကို ရယူလိုက်ခြင်းဖြစ်သည်။ အစိုးရအဖွဲ့တွင်း ဝင်လှုပ်ရှားမှသာ မြန်မာပြည်ကို ပြောင်းနိုင်မည်ဖြစ်ရာ ထိုအခွင့်အရေးကိုရာစုနှစ် လေးပုံတစ်ပုံကျော် စောင့်ခဲ့ရသော ဒေါ်အောင်ဆန်းစုကြည်၏ ဆုံးဖြတ်ချက်သည် သဘာဝကျသည်။

သမ္မတဦးဝင်းမြင့် လက်ထက်တွင်မူ ပိုနေရာပေးသည့်သဘော မြင်လာရသည်။ ဦးဝင်းမြင့်၏မိန့်ခွန်းများ ပိုရှည်လာသည်။ အချိန်ကာလက ၂၀၂၀ နှင့် နီးလာပြီ။ အစိုးရအဖွဲ့ကို ဦးဝင်းမြင့်နှင့်လွှဲထားပြီး ၂၀၂၀ ရွေးကောက်ပွဲနိုင်ရန် ဖိမည်ဟု ကြားရသည်။

ဒေါ်အောင်ဆန်းစုကြည်အနေနှင့် ၂၀၂၀ ရွေးကောက်ပွဲကာလတွင် ရွေးကောက်ပွဲအောင်နိုင်ရေးအတွက် ပါတီသို့ပြန်မည်ဆိုသည့် သတင်းများထွက်ပေါ်နေသလို ယင်းသို့ ထင်ကြေးပေးသူများလည်း တီးတိုးတီးတိုးရှိနေသည်။

ယင်းအချက်နှင့်ပတ်သက်၍မူ ပါတီဘက်က ငြင်းဆိုသည်။

“အဲဒါကတော့ ကျွန်တော်တို့ဥက္ကဋ္ဌ ကိုယ်တိုင်ဆုံးဖြတ်ရမယ့် ကိစ္စပါခင်ဗျ။ ကျွန်တော်တို့ကတော့ ဘာမှမသိပါဘူး” ဟု ပါတီ၏ပြောရေးဆိုခွင့်ရှိသူ ဒေါက်တာမျိုးညွန့်က ဆိုသည်။

၂၀၁၅ တွင် မဲဆွယ်အရာရှိချုပ်ဖြစ်ခဲ့သလို၂၀၂၀ ရွေးကောက်ပွဲတွင်ရော မဲဆွယ်အရာရှိချုပ်ဖြစ်ဖို့ လိုသလား။

၂၀၀၈ အခြေခံဥပဒေအရ ပြည်ထောင်စုအစိုးရအဖွဲ့ဝင်များသည် ပါတီနိုင်ငံရေးတွင် ပါဝင်ခြင်းမပြုရဟုဆိုထားသည်။ ထို့ကြောင့် အစိုးရအဖွဲ့ဝင်များသည် အင်တိုက်အားတိုက် စည်းရုံးလျှင် သီအိုရီသဘောအရ ငြိနိုင်သည်။ ရွေးကောက်ပွဲကြောင့်ချည်းမဟုတ်ဘဲ သူ့နေရာကိုဆက်ခံနိုင်ရန် လေ့ကျင့်ပေးခြင်းပေလား။ ဆိုနီရာ ဂန္ဓီလမ်းကြောင်းသို့ ဒေါ်အောင်ဆန်းစုကြည် သွားနေပြီလား။

NLD ပါတီသည် ဒေါ်အောင်ဆန်းစုကြည် နေအိမ်အကျယ်ချုပ်မှု လွတ်မြောက်လာပြီးနောက် ၂၀၁၂ နောက်ပိုင်း လွတ်လပ်စွာ စည်းရုံးလှုပ်ရှားခွင့်များရလာချိန်တွင် အင်အားကြီးထွားလာခဲ့သည်။ အာဏာရပါတီဖြစ်သောအခါ ပိုပြီးတောင့်တင်းလာသည်။

ပါတီ၏ ဝါစဉ်အရကြည့်လိုက်လျှင် ဒုဥက္ကဋ္ဌ(၂) ဦးဝင်းမြင့်နှင့် ဒုဥက္ကဋ္ဌ (၂) ဒေါက်တာဇော်မြင့်မောင်တို့က ထိပ်ဆုံးနေရာတွင် ရှိနေကြသည်။ သူတို့သည် အုပ်ချုပ်ရေးပိုင်းတွင်လည်း အမြင့်ဆုံးရာထူးများကို ကိုင်ထားကြသည်။

ဦးဝင်းမြင့်က သမ္မတ၊ ဒေါက်တာ ဇော်မြင့်မောင်က မန္တလေးတိုင်းဒေသကြီး ဝန်ကြီးချုပ်နေရာကို ယူထားသည်။

ဒေါ်အောင်ဆန်းစုကြည်နေရာတွင် ယင်းတို့ အစားဝင်နိုင်မည်လား။

ဦးဝင်းမြင့်နှင့် ဦးဇော်မြင့်မောင် တို့သည် ၁၉၈၈ ကတည်းကပါလာသော နိုင်ငံရေးသမားများဖြစ်သော်လည်း ထိပ်ဆုံး နိုင်ငံရေးခေါင်းဆောင်များတွင် ရှိတတ်သည့် ညှို့အားနည်းပါးနေသေးသည်။

သို့သော် NLD ၏ အဆိုအရမူ ဒေါ်အောင်ဆန်းစုအလွန်တွင် ပါတီကို သူတို့နှစ်ဦးလက်ထဲသို့ အပ်မည့်ပုံရှိနေသည်။

“အဲဒီဟာက ကျွန်တော်တို့ နောင်တာဝန်ယူမှုအဆင့်ဆင့်ကို ချပြထားတာပါ။ အဆင့်ဆင့် တာဝန်ယူသွားရမှာပါ” ဟု ပါတီ၏ပြောရေးဆိုခွင့်ရှိသူ ဒေါက်တာမျိုးညွန့်က ဒုတိယဥက္ကဋ္ဌ ၁ နှင့် ၂ တို့နှင့်ပတ်သက်၍ ပြောဆိုသည်။

ဒေါ်အောင်ဆန်းစုကြည်ကိုဆက်ခံမည့် လက်ရှိလျာထားသည့် ခေါင်းဆောင်များသည် အသက် ၇၀ တန်းအရွယ်များဖြစ်နေရာ သူတို့သည်ပင် သိပ်မကြာခင်တွင် အနားယူရန် အခြေအနေဖြစ်နေပြန်သည်။



မျိုးဆက်သစ်လူငယ်များထဲမှ နောက်ထပ်ခေါင်းဆောင်များ ထွက်ပေါ်လာရန်မှာမူ အခြေအနေအရဟု ဒေါက်တာမျိုးညွန့်ကဆိုသည်။

“ကျွန်တော်တို့ ဘယ်သူဘယ်ဝါရယ်လို့တော့ သတ်မှတ်ထားတာမရှိပါဘူး။ ကျွန်တော်တို့ တာဝန်တွေပေးတယ်။ ကျွန်တော်တို့က လေ့ကျင့်တဲ့ သင်တန်းတွေရှိတယ်။ အခုလူငယ်တွေ တော်တော်များများလည်း လွှတ်တော်ကိုယ်စားလှယ်တွေ တာဝန်တွေ၊ အုပ်ချုပ်ရေးတာဝန်တွေလည်း ကျွန်တော်တို့ ထည့်ထားပါတယ်။ အဲဒီတော့ သူတို့ရဲ့စွမ်းဆောင်ရည်အပေါ်မူတည်ပြီးတော့ ပြည်သူက ဘယ်လောက်လက်ခံနိုင်တယ်၊ သူ့ရဲ့လုပ်ဆောင်မှုအပေါ်မူတည်ပြီးတော့ သူ့ရဲ့နိုင်ငံရေးအစဉ်အလာက ဆက်ဖြစ်လာမှာပါခင်ဗျ။ တရားသေကြီး သတ်မှတ်ထားတာကတော့ ဒါ မသင့်တော်ဘူးထင်ပါတယ်” ဟု ဒေါက်တာမျိုးညွန့်က ဆိုသည်။

ရှစ်လေးလုံးအရေးတော်ပုံကတည်းက ကျော်ကြားခဲ့သော ဒီမိုကရေစီခေါင်းဆောင်များအနက် ပြည်တွင်းအခြေစိုက်နေသူများမှာ ဦးမင်းကိုနိုင်နှင့် ဦးကိုကိုကြီးဖြစ်သည်။

သူတို့နှစ်ဦးလုံးမှာ NLD ပါတီဝင်များမဟုတ်။

“ဒေါ်အောင်ဆန်းစုကြည်၏ ကျန်းမာရေးသည် နိုင်ငံ၏ကျန်းမာရေးဖြစ်သည်” ဟုပြောဆိုခဲ့သူ ဦးကိုကိုကြီးမှာ ၂၀၁၅ ရွေးကောက်ပွဲအကြိုကာလက NLD ပါတီသို့ ဝင်ရောက်ခဲ့သေးသော်လည်း နောက်ပိုင်းတွင် ပြန်ထွက်ခဲ့ရသည်။

သူသည် ကိုယ်တိုင်ပါတီတည်ထောင်ရန် ကြိုးစားနေသည်။

ထိုသို့ ပါတီသီးသန့်ထောင်လိုက်သည့်အတွက် ဦးကိုကိုကြီးသည် NLD ၏ ပြိုင်ဘက်သဖွယ် ဖြစ်လာနေသည်။ ဦးကိုကိုကြီးကိုယ်တိုင်က ဒေါ်အောင်ဆန်းစုကြည်၏နေရာကိုဆက်ခံရန် ကြိုးစားနေသလား။

ယင်းသို့ တိုက်ရိုက်ပြောဆိုခြင်းမပြုသော်လည်း ပါတီတည်ထောင်ရန် ကြိုးပမ်းလာရခြင်းသည် လစ်ဟာနေသည့် မြန်မာ့နိုင်ငံရေးကွက်လပ်ကို ဖြည့်ဆည်းရန်ဟု ဦးကိုကိုကြီးက မကြာခဏ ပြောဆိုလေ့ရှိသည်။

ဦးမင်းကိုနိုင်ကမူ ပါတီထောင်ခြင်း မရှိသေးပေ။

ဒေါ်အောင်ဆန်းစုကြည် မြန်မာ့နိုင်ငံရေးတွင်း ဆက်မရှိနေတော့လျှင်မူ ပြန်ဝင်လာမည်လား။



အဆုံးအဖြတ်ပေးသူ

ဒေါ်အောင်ဆန်းစုကြည်၏နေရာကို မည်သူဆက်ခံမည်လဲဟု မေးခွန်းမေးလျှင် မြန်မာနိုင်ငံ လက်ရှိသွားနေသည့် ခေါင်းဆောင်ရွေးချယ်သည့် စနစ်ကိုကြည့်ရမည်။ ရွေးကောက်ပွဲစနစ်ဖြင့်သွားသည့် နိုင်ငံများတွင် ရွေးကောက်ပွဲများက ဆက်ခံမည့်ခေါင်းဆောင်ကိုရွေးသည်။ မဲဆန္ဒရှင်များ၏ အဆုံးအဖြတ်က အဓိကဖြစ်သည်။ ပါတီတွင်း ဒေါ်အောင်ဆန်းစုကြည်အား ဆက်ခံမည့်သူကို ဒေါ်အောင်ဆန်းစုကြည်က ဆုံးဖြတ်နိုင်သော်လည်း တကယ်တမ်း ဆုံးဖြတ်မည့်သူမှာမူ ရွေးကောက်ပွဲများ ရှိနေသရွေ့ မဲဆန္ဒရှင်သာဖြစ်သည်။

ခြွင်းချက်များလည်းရှိသည်။ ရွေးကောက်ပွဲစနစ်ဖြင့်သွားသော်လည်း တစ်ပါတီတည်းကကြီးစိုးသည့် နိုင်ငံများတွင် ပါတီထိပ်ဆုံးခေါင်းဆောင်က ရွေးထားသောသူများသည် ဆက်ခံမည့်သူများဖြစ်လာသည်။ ဥပမာ စင်ကာပူ၊ မလေးရှား၊ ဂျပန်တို့ဖြစ်သည်။ သို့သော် ထိုနိုင်ငံများမှ တစ်ပါတီအစိုးရများသည် နိုင်ငံကို ကြီးပွားတိုးတက်အောင် စွမ်းဆောင်နိုင်ကြသည်။ ဆိုလိုသည်မှာ စီးပွားရေးဖွံ့ဖြိုးတိုးတက်မှု ဆောင်ကြဉ်းပေးခြင်းတည်းဟူသော လက်ခံအသိအမှတ်ပြုမှု Legitimacy ရှိကြသည်။

မြန်မာနိုင်ငံ အခြေအနေမှာမူ မဲဆန္ဒရှင်များအပြင် မင်းမြှောက်နိုင်မည့် အဖွဲ့အစည်းတစ်ရပ်ရှိသေးသည်။

ယင်းကားတပ်မတော်။

အစိုးရခေါင်းဆောင်နေရာကိုရော၊ တပ်မတော်၏ထောက်ခံချက်ကိုရလျှင် အနည်းဆုံး ဒုသမ္မတဖြစ်နိုင်သည်။

တပ်မတော်နှင့်အလျဉ်းသင့်သော နိုင်ငံရေးပါတီတစ်ခုခုက မဲဆန္ဒနယ်များ၏ ၂၆ ရာခိုင်နှုန်းကိုရလျှင် သမ္မတဖြစ်နိုင်သည်။ မဲဆန္ဒနယ်အများစုကို ရရန်မလိုပေ။ တပ်မတော်၏ထောက်ခံချက်ကိုရသူသည် ဒီမိုကရေစီလှုပ်ရှားမှု၏ ခေါင်းဆောင်ဖြစ်လာချင်မှ ဖြစ်လာမည်။ သို့သော် သူသည် နိုင်ငံကိုကိုယ်စားပြုသောအစိုးရ၏ ခေါင်းဆောင်ဖြစ်လာနိုင်သည်။

တပ်မတော်က မည်သူ့ကိုထောက်ခံမည်နည်း။

တပ်မတော်သားမဟုတ်ခဲ့သူ တစ်ဦးကို ထောက်ခံမည်လား။ ယင်းတို့သည်လည်း ဆောင်းပါး၏ မူရင်းမေးခွန်းနှင့် ဆက်စပ်သည်။

ဒေါ်အောင်ဆန်းစုကြည်နေရာကို အမှန်တကယ် ဆက်ခံမည့်သူများကမူ ဒီမိုကရက်တစ် Institutions (အဖွဲ့ အစည်းမူဘောင်) များသာဖြစ်မည်။

နိုင်ငံတစ်နိုင်ငံအနေနှင့် အဖွဲ့အစည်းများ ခိုင်မာစွာတည်ဆောက်ထားနိုင်ရန် အရေးကြီးကာ ယင်းအခြေအနေရှိနေပါက ခေါင်းဆောင်တစ်ဦးတစ်ယောက် မရှိသော်လည်း အရှိန်မပျက် ဆက်လျှောက်နေနိုင်မည်ဖြစ်သည်။

လက်ရှိ မြန်မာနိုင်ငံ၏ ပြုပြင်ပြောင်းလဲရေးလုပ်ငန်းစဉ်များတွင် အဆိုပါ Institution များ ခိုင်မာစွာတည်ဆောက်နိုင်ရေးကိစ္စတို့လည်း အပါအဝင်ဖြစ်သည်။

ဥပဒေပြုရေး၊ အုပ်ချုပ်ရေး၊ တရားစီရင်ရေးတို့မှသည် ရွေးကောက်ပွဲဆိုင်ရာ လုပ်ငန်းစဉ်များ၊ ဝန်ထမ်းရွေးချယ်ခန့်ထားရေးလုပ်ငန်းစဉ်များနှင့် နိုင်ငံရေးပါတီများ စသည့် Institution များ ခိုင်မာနေမည်ဆိုပါက စိတ်ပူရန်မလိုဟု ဦးခိုင်ဝင်းကဆိုသည်။

ဦးခိုင်ဝင်းသည် ပြည်သူ့မူဝါဒရေးရာ ကျွမ်းကျင်ပညာရှင်ဖြစ်ပြီး Sandhi Govermance Institute ၏ ဒါရိုက်တာလည်းဖြစ်သည်။

သို့သော် Institution များ ခိုင်မာစွာ တည်ဆောက်နိုင်ပြီးသည့် နိုင်ငံများ သို့မဟုတ် ဖွံ့ဖြိုးပြီးနိုင်ငံများအနေနှင့် ခေါင်းဆောင်တစ်ဦးတစ်ယောက်အပေါ် မှီခိုနေရန် မလိုအပ်လှသော်လည်း ဖွံ့ဖြိုးဆဲနိုင်ငံသာဖြစ်သည့် မြန်မာနိုင်ငံအနေနှင့်မူ ခေါင်းဆောင်၏အခန်းကဏ္ဍသည် အရေးပါနေဦးမည်ဖြစ်သည်။

ဒေသတွင်းနိုင်ငံများဖြစ်သည့် စင်ကာပူ၊ မလေးရှားစသည့်နိုင်ငံများပင်လျှင် လူပုဂ္ဂိုလ်ခေါင်းဆောင်မှု၏အခန်းကဏ္ဍက ကြီးကြီးမားမားရှိခဲ့သည်။ သာဓကအားဖြင့် စင်ကာပူ၏ဖခင်ကြီး လီကွမ်ယူး၊ လက်ရှိမလေးရှားနိုင်ငံ၏ဝန်ကြီးချုပ် မဟာသီယာမိုဟာမက်တို့ဖြစ်သည်။ ခေါင်းဆောင်တစ်ဦးတစ်ယောက်အပေါ်ကို မှီခိုအားထားနေရဦးမည်။

“တို့လို ဖွံ့ဖြိုးဆဲနိုင်ငံတွေမှာကျတော့ Leader (ခေါင်းဆောင်) ကလည်း အရမ်းအရေးကြီးတယ်ပေါ့နော်။ Leader ရဲ့ဦးဆောင်မှုကတော့ အရမ်းကို အရေးကြီးတယ်ပေါ့” ဟု ဦးခိုင်ဝင်းကဆိုသည်။

“အဲဒီတော့ ဒီ Institution တွေ ခိုင်မာဖို့ကို လုပ်မယ့်သူကလည်း ဘယ်သူလဲဆိုတော့ ဒီ Leader ကပဲ လုပ်ချင်ကိုင်ချင်စိတ်ရှိတဲ့၊ တကယ့်ကို Political Will ရှိတဲ့ ခေါင်းဆောင်ကပဲ လုပ်မှပဲရမှာပဲ”

လောလောဆယ်တွင်မူ ဗြိတိသျှဘုရင်မကြီးမွေးနေ့တွင် ပြောကြသောစကားကိုသာ ပြောနေရဦးမည်။

‘Long live the Queen!’

‘ဘုရင်မကြီး သက်တော်ရာကျော်ရှည်ပါစေ’

TVJ

Share it:

Article

Daw Aung San Suu Kyi

Featured

Myanmar

Opinion

Political

Post A Comment: