ဒေါ်လာဈေးအတက် ကျပ်ငွေတန်ဖိုး အကျ ရွှေဈေးကအစ ကုန်ဈေးနှုန်းတွေ မြင့်တက်နေပြီလား

Share it:

မင်းဗညား ၊ ရန်ကုန်

မြန်မာ့စီးပွားရေးဂယက်
-----------------------------
နိုင်ငံသည် အာရှဒေသတွင် စီးပွား ရေး ဖွံ့ဖြိုးတိုးတက်မှုနှုန်း အမြင့်ဆုံးဆိုသည့် ပြောစကားများနည်းတူ ကုန်ဈေးနှုန်း မြင့်တက်သည်ဆိုသော်လည်း အခြေခံစားကုန်များ ပြောင်းလဲခြင်းမရှိကြောင်း ပြောဆိုသည့် သတင်းစကားများသည် ယခုရက်ပိုင်းအတွင်း ပြည်သူများအကြား ပျံ့နှံ့လျက်ရှိသည်။ တကယ့်လက်တွေ့ဘဝတွင်မူ ပြည်သူများသည် တရိပ်ရိပ်မြင့်တက်လျက်ရှိသည့် ကုန်ဈေးနှုန်း ကြီးမြင့်မှုဒဏ်ကို ခါးစည်းခံနေကြရသည်ဟုဆိုကြသည်။ ဈေးဝယ်ထွက်ရန် ပြင်ဆင်နေသည့် အိမ်ရှင်မများ၊ အစိုးရ၊ ပုဂ္ဂလိက အလုပ်သမား၊ အခြေခံလူမှုဘဝမှ ဈေးသည်များနှင့် လက်လုပ်လက်စားဝင်ငွေ ရှိနေကြသူများပင် ဝင်ငွေနှင့်ထွက်ငွေ မမျှတမှုများကြောင့် ညည်းတွားနေကြချိန်လည်း ဖြစ်သည်။

တစ်ချိန်က အထီးကျန်နိုင်ငံ တစ်နိုင်ငံဖြစ်သည့် မြန်မာနိုင်ငံသည် ယခုအခါ၌ အာရှဒေသတွင် စီးပွားရေးတိုးတက်မှုအမြင့်ဆုံး နိုင်ငံတစ်နိုင်ငံအဖြစ် ရောက်ရှိနေပြီဖြစ်ကြောင်း မြန်မာနိုင်ငံ ရင်းနှီးမြှုပ်နှံမှုကော်မရှင်ဥက္ကဋ္ဌလည်းဖြစ် ပြီး ပြည်ထောင်စုအစိုးရအဖွဲ့ရုံးဝန်ကြီးဖြစ်သည့် ဦးသောင်းထွန်းက ထိုင်းနိုင်ငံ၌ ကျင်းပသည့် Myanmar Insight 2018 ဆွေးနွေးပွဲတွင် ပြောဆိုခဲ့ခြင်း ဖြစ်သည်။ ထို့အပြင် ပြုပြင်ပြောင်းလဲရေး ခိုင်မာစေရန်အတွက် ဆက်လက်ဆောင်ရွက်ရာတွင် အခြေခံအဆောက်အအုံ အားနည်းမှုများနှင့် လျှပ်စစ်ဓာတ်အား လုံလောက်စွာ မရရှိနိုင်သေးခြင်းစသည့် စိန်ခေါ်မှုများရှိနေကြောင်း ဝန်ကြီးက ပြောဆိုခဲ့သည်။ ရင်းနှီးမြှုပ်နှံသူများအနေဖြင့် ထိုစိန်ခေါ်မှုများကို အခွင့်အလမ်းဖြင့် ပြောင်းလဲ နိုင်သကဲ့သို့ နိုင်ငံ၏ မဟာဗျူဟာကျသည့်အနေအထားကြောင့် မြန်မာနိုင်ငံတွင် ရင်းနှီးမြှုပ်နှံမှု များ ဆောင်ရွက်ရန် အချိန်တန်ပြီဖြစ်ကြောင်း တိုက်တွန်းပြောဆိုခဲ့ခြင်း ဖြစ်သည်။

''ရင်းနှီးမြှုပ်နှံမှု ကော်မရှင်ဆိုတာ ဈေး ရောင်းတဲ့သူပဲလေ။ ဒီတော့ နိုင်ငံခြားသား ရင်း နှီးမြှုပ်နှံသူတွေ လက်ရှိအခြေအနေအပေါ် အကောင်းမြင်အောင် ဆွဲဆောင်ပြောဆိုရမှာပဲ။ သူ့ကို အပြစ်တင်လို့မရဘူး။ ပြည်တွင်းက တာဝန်ရှိသူတွေ အခြေအနေမှန်ကို မသုံးသပ်ဘဲ လူထုကို ဈေးရောင်းသလို၊ မဲဆွယ်သလို အားလုံးကောင်း၊ အလွန်ကောင်းဆိုပြီး အရောင်းမြှင့်တင်ရေး မလုပ်ဖို့သာ အရေးကြီးပါတယ်''ဟု အဆိုပါကိစ္စနှင့်ပတ်သက်၍ ပြန်ကြားရေးဝန် ကြီးဟောင်းတစ်ဦးဖြစ်သည့် ဦးရဲထွဋ်က သူ၏ ဖေ့စ်ဘွတ်ခ်စာမျက်နှာတွင် ရေးသားထားသည်။ အမျိုးသားဒီမိုကရေစီအစိုးရလက်ထက်အတွင်း ပြည်ပရင်းနှီးမြှုပ်နှံမှု ဝင်ရောက်သည့် အခြေအနေသည် မျှော်မှန်းသကဲ့သို့ ဖြစ်ပေါ် မလာသေးကြောင်း စီးပွားရေးပညာရှင်အချို့က ထောက်ပြပြောဆိုကြသည်။ ထို့အပြင် နိုင်ငံ ခြား ရင်းနှီးမြှုပ်နှံမှုများ ဝင်ရောက်နိုင်ရန် ဥပဒေများ ပြင်ဆင်ရေးဆွဲနေရခြင်း၊ တိုင်းပြည်အတွင်း ပဋိပက္ခဖြစ်စဉ်များ ဖြစ်ပေါ်ခဲ့ခြင်း စသည့်အခြေ အနေများကြောင့် ပြည်ပရင်းနှီးမြှုပ်နှံမှု ဝင် ရောက်ခြင်း နည်းပါးခဲ့သည်။



ထို့အပြင် တိုင်းပြည်အတွက် ဝင်ငွေရရှိနိုင်မည့် ခရီးသွားလုပ်ငန်းများတွင်လည်း ထိ ရောက်သည့် လုပ်ဆောင်မှုမရှိခြင်းကြောင့် အာဆီယံ ဒေသတွင်းနိုင်ငံများတွင် မြန်မာနိုင်ငံသည် အောက်ဆုံးအခြေအနေသို့ ရောက်ရှိနေပြန်သည်။ စစ်တမ်းများအချို့အရ စီးပွားရေးတိုးတက်မှုနှုန်း GDP Growth Rate များ မြင့်တက်လာမှုများ ရှိနေသော်လည်း ထိုအချက်သည် ငွေ ကြေးဖောင်းပွကို ဖြစ်ပေါ်စေနိုင်သည့်အကြောင်း အရာများထဲမှတစ်ခုလည်း ဖြစ်နေသည်။ ''သူတို့ပြောတာက Growth Rage တက် နေတယ်လို့ ပြောတယ်။ ဘာကြောင့်တက်လဲဆိုရင် မြန်မာပြည်ရဲ့ မနှစ်ကရာခိုင်နှုန်းပေါ်မှာ တွက်လိုက်လို့။ အများကြီးပြနေတယ်။ မနှစ်က ညံ့လို့ ဒီနှစ်တက်တာ။ စင်ကာပူဆိုရင် နှစ်တိုင်း ကောင်းနေလို့ One Percent တောင် မတက်ချင်ဘူး။ အလွန်ဆုံး One Percent အကျော်ပဲ။ စီးပွားရေး ဖွံ့ဖြိုးတိုးတက်မှုနှုန်းဆိုတာ ကိုယ့်ဘာသာတိုင်းတာ။ အဲဒီလိုမျိုး ကြွားချင်တယ်ဆိုရင် ၁ဝ နှစ်ဆက်တိုက် ၁ဝကျော်တက်မှ ကြွား လို့ရမယ်။ အဲဒီလိုမှ မဟုတ်ရင် ထည့်မပြောရဘူး။ GDP ရယ် GNI ရယ် တက်မှမတက်တာ။ အဲဒီလိုမျိုးတွေတွက်ရသေးတယ်''ဟု စီးပွားရေးပညာရှင် ဦးလှမောင်က ပြောသည်။

ယခုအချိန်သည် တိုင်းပြည်၏စီးပွားရေး အခြေအနေ ပြန်လည်ဦးမော့ရန်အတွက် ဦးစားပေး ဆောင်ရွက်ရမည့် အချိန်ကာလဖြစ်သည်။ အိမ်နီးချင်းနိုင်ငံများတွင် စီးပွားရေးဖွံ့ ဖြိုးတိုးတက်မှုနှုန်း မြန်ဆန်စွာ ဖြစ်ပေါ်သွားသည့် နိုင်ငံများကို သာဓကထားကာဆောင်ရွက်သင့်ကြောင်း စီးပွားရေးပညာရှင်အချို့က မှတ် ချက်ပြု ပြောဆိုသည်။ ''အဲဒါကတိုင်းပြည်ကို ဦးဆောင်တဲ့ လူ တွေက အာရုံစိုက်ပြီးလုပ်ဖို့ အရေးကြီးတယ်။ မဟုတ်ရင်တော့ စီးပွားရေးက တက်မလာဘဲ ဒေါ်လာဈေးက တအားတက်လာတယ်။ ဒေါ်လာဈေးတက်တော့ ကုန်ဈေးနှုန်းတက်ပြီးတော့ အားလုံး ဆင်းရဲတွင်းနက်နေတယ်''ဟု ဦးလှ မောင်က ဆက်လက်ပြောဆိုသည်။

ဒေါ်လာဈေးအတက် ကျပ်ငွေတန်ဖိုး ကျဆင်းနေမှု
----------------------------------------------------------

ဈေးကွက်အတွင်း ဒေါ်လာဈေးမြင့်တက် လာကာ မြန်မာကျပ်ငွေ တန်ဖိုးကျဆင်းနေပြီး ငွေကြေးဖောင်းပွမှုလည်း ဖြစ်ပေါ်လျက်ရှိသည်။ ယခုနှစ်ဇွန်လ၏ ငွေကြေးဖောင်းပွမှုနှုန်းသည် ၄ ဒသမ ၅၈ ရာခိုင်နှုန်းခန့်ရှိကြောင်း ဗဟိုစာရင်းအင်းအဖွဲ့မှ ထုတ်ပြန်ထားသည်။ ငွေကြေး ဖောင်းပွမှုနှုန်းကို နည်းမျိုးစုံဖြင့် တိုင်းတာတွက်ချက်လေ့ရှိကြသည်။ သို့သော် မြန်မာနိုင်ငံတွင်မူ နေ့စဉ်မြင့်တက်လျက်ရှိသည့် ကုန်ဈေးနှုန်းများက ငွေကြေးဖောင်းပွမှုကို ထင်ဟပ်နေစေသည်။ ငွေကြေးဖောင်းပွမှုနှုန်းသည် ရာခိုင်နှုန်း ၂ဝ ထက် ကျော်လွန်ပါက တိုင်းပြည်၏ စီးပွား ရေးအတွက် ထိခိုက်နစ်နာမှုများရှိလာနိုင်သည်ဟု ပညာရှင်များက ဆိုထားကြသည်။ လက် တွေ့တွင်မူ ငွေကြေးဖောင်းပွမှုသည် ခြောက် ရာခိုင်နှုန်းထက် ကျော်လွန်ပါက တိုင်းပြည်၏စီးပွားရေးနစ်နာမှုများ ရှိလာနိုင်ကြောင်းတွက် ချက်ထားကြသည်။

ဇူလိုင် ၂၃ ရက်အထိ ဈေးနှုန်းများအရ ပြည်ပငွေလဲလှယ်မှုတွင် အမေရိကန်ဒေါ်လာ တစ်ဒေါ်လာလျှင် ၁၄၂၂ ကျပ်နှင့် ယူရိုငွေလဲ လှယ်မှုသည် ၁၆၆၇ ကျပ်အထိ မြင့်တက်နေဆဲ ဖြစ်သည်။ ထိုအခြေအနေသည် ယခုနှစ်အတွင်း စံချိန်တင် ပြန်လည်မြင့်တက်လာခဲ့ခြင်းဖြစ်သည်။ အဆိုပါဖြစ်စဉ်မျိုး ၂ဝ၁၆ ခုနှစ်အတွင်း ကြုံတွေ့ခဲ့ရပြီး တစ်ဒေါ်လာလျှင် ၁၄၄၄ ကျပ် ဖြင့် အမြင့်ဆုံးမြင့်တက်ခဲ့သည်။ ထို့နောက် တစ် ဒေါ်လာလျှင် ၁၃၅ဝ ကျပ်ခန့်ဖြင့် ဈေးငြိမ်ခဲ့ပြန်သည်။ ယခုနှစ် ဇွန်လအတွင်းမှစတင်ကာ ဈေးဆွဲတင်မှုအချို့ကြောင့် တစ်ဒေါ်လာလျှင် ၁၃၅ဝ ကျပ်မှ ၁၄၂၂ ကျပ်အထိ အမြင့်ဆုံးသို့ ပြန်လည် ရောက်ရှိခဲ့ကြောင်းသိရသည်။ ပြည်ပငွေလဲလှယ်မှု မြင့်တက်နေချိန်တွင် ရွှေဈေးကွက်အတွင်း အကယ်ဒမီ မီးလင်းအ ခေါက်ရွှေ၏ ဈေးနှုန်းများသည် ကျပ် ၉၄၇၉ဝဝ ခန့်ဖြင့် အရောင်းဈေးကွက်ရှိနေကြောင်း သိရသည်။ ကမ္ဘာ့ရွှေဈေးနှုန်းသည် တစ်အောင်စလျှင် ၁၂၃ဝ ဒသမ ၈ ဒေါ်လာခန့်ရှိကြောင်းသိရသည်။ ရွှေဈေးနှုန်းအခြေအနေသည် အမြင့်ပိုင်းတွင်သာ ဆက်လက်ရှိနိုင်မည်ဖြစ်ကြောင်း ရွှေလုပ်ငန်းရှင်အချို့က သုံးသပ်ထားကြသည်။



''ဈေးကတော့ အခုရက်ပိုင်းအတွင်း တက်လာတယ်။ မိုးတွင်းပိုင်းဆိုတော့လဲ အရောင်း အဝယ်က နည်းနည်းအေးတယ်။ ဈေးနှုန်းက တော့ အမြင့်ပိုင်းမှာပဲ ဆက်ရှိနေဦးမယ်''ဟု ရွှေလုပ်ငန်းရှင်တစ်ဦးက ပြောဆိုသည်။ ထို့အတူ ပြည်တွင်းရွှေဈေးကွက်အတွင်း ဇွန်လပိုင်းခန့်က အခေါက်ရွှေတစ်ကျပ်သားလျှင် ကျပ် ၉၃၇ဝဝဝ ခန့်ရှိခဲ့ကြောင်းသိရသည်။ ကမ္ဘာ့ရွှေဈေးသည်လည်း ဇွန်လအတွင်း တစ် အောင်စလျှင် ၁၂၉၆ ဒသမ ၉ ဒေါ်လာခန့်ရှိခဲ့ကြောင်းသိရသည်။ ကမ္ဘာ့အင်အားကြီးနိုင်ငံများဖြစ်ကြသည့် အမေရိကန်နှင့် တရုတ်နိုင်ငံတို့အကြား ဖြစ်ပေါ်ခဲ့သည့် ကုန်သွယ်ရေး အခွန်ဂယက်ကြောင့် ကမ္ဘာ့နိုင်ငံအသီးသီးတွင် ရိုက်ခတ်မှုရှိခဲ့သည်။ ထိုအထဲတွင် မြန်မာနိုင်ငံသည်လည်း တစ်ခုအပါအဝင်ဖြစ်ပြီး ထိုဂယက်နှင့်အတူ တရိပ်ရိပ်ခံနေရဆဲ ဖြစ်သည်။ ထိုကဲ့သို့ဖြစ်ရခြင်းသည် အစိုးရအနေဖြင့် ဘဏ္ဍာရေးလိုငွေပြမှု ကြီးများခြင်း၊ ထုတ်ကုန်သွင်းကုန် ချိန်ညှိနိုင်မှု မရှိခြင်း၊ ကုန်သွယ်ရေးလိုငွေပြမှုများရှိခြင်း စသည့် အခြေအနေများ ကြောင့် ပြည်ပရင်းနှီးမြှုပ်နှံမှု ဝင်ရောက်ခြင်း မရှိသကဲ့သို့ ကျပ်ငွေတန်ဖိုးကျဆင်းကာ ဒေါ်လာဈေးမြင့်တက်မှု ဖြစ်စဉ်များ ဖြစ်ပေါ်နေခဲ့ ခြင်း ဖြစ်သည်။

''ဒေါ်လာဈေးတက်တယ်။ ပြည်ပပို့ကုန် ကနေပြီးတော့ ဒေါ်လာဝင်ငွေရတဲ့လူတွေက သွင်းကုန်တင်သွင်းမယ့်လူတွေကို ဈေးကောင်း ကောင်းနဲ့ ရောင်းလိုက်တယ်။ အဲဒီလိုထိတဲ့လူ တွေက နိုင်ငံခြားကနေပြီး ဆေးဝါးတွေ၊ ပစ္စည်း တွေ၊ ဓာတ်ဆီတွေ၊ ကားတွေ တင်သွင်းတယ်။ အဲလို တင်သွင်းလာတဲ့ဟာတွေက အဆမတန် ဈေးတက်လာမယ်။ သယ်ယူပို့ဆောင်စရိတ် ဈေးတက်မယ်။ နောက်ပြီးတော့ ကုန်ပစ္စည်းတွေ ဈေးတက်မယ်။ အဲဒီတော့ ပုံမှန်ဝင်ငွေရှိတဲ့ အစိုးရ၊ပုဂ္ဂလိက၊ လက်လုပ်လက်စားတွေ တစ်နေ့လုပ် တစ်နေ့စားတွေက မှန်နေတာပဲ။ ပုံမှန်ဝင်နေတာ။ ဝင်တဲ့ငွေက ပုံမှန်ပဲ။ ကုန်ဈေးနှုန်းကြီးက ကြီးလာတော့ ပိုမလောက်တော့ ပိုဆင်းရဲသွားမှာပေါ့။ လူနေမှုအဆင့်အတန်းတွေ နိမ့်ပြီးတော့ လူတွေဟာ တကယ့်ဆင်းရဲတဲ့နိုင်ငံက လူတွေလို ဖြစ်နေမှာပေါ့''ဟု စီးပွားရေးပညာရှင်တစ်ဦးက သုံးသပ်ပြောဆိုသည်။

ကျပ်ငွေကြေး တန်ဖိုးများ ကျဆင်းနေပြီး ဒေါ်လာဈေးနှုန်း မြင့်တက်ချိန်တွင်မူ အစိုးရမှ ထုတ်ဝေလျက်ရှိသည့် ကြေးမုံသတင်းစာ (ဇူလိုင် ၁ဝရက်)တွင် 'ငွေလဲနှုန်း ထပ်မံမြင့်တက်၊ ပို့ကုန်ဝင်ငွေ ပိုမိုရရှိ'ဟု သတင်းတစ်ပုဒ် ဖော် ပြပါရှိမှုအပေါ် ဝေဖန်မှုများ မြင့်တက်ခဲ့သည်။ ဒေါ်လာဈေးနှုန်း မြင့်တက်နေချိန်တွင် ပို့ ကုန်ဝင်ငွေ ရရှိသည်ဟုဆိုခြင်းထက် သွင်းကုန် ပစ္စည်းများ ဒေါ်လာဖြင့် ဝယ်ယူရခြင်းကြောင့် ပြည်တွင်းသို့ရောက်ရှိလာမည့် စက်သုံးဆီမှစ၍ အခြားကုန်ပစ္စည်းများ၏ ဈေးနှုန်းကြီးမြင့်လာနိုင်မှုကို ဖော်ပြထားခြင်းမရှိဘဲ ရေးသားထား ခြင်းသည် ထောက်ပြရန်အချက်ပင်ဖြစ်ပေသည်။

ကုန်ဈေးနှုန်း မြင့်တက်မှု
------------------------------
''လက်ရှိ မြေပြင်အနေအထားမှာ ပြည်သူကြားမှာ သွားလာလှုပ်ရှားနေတော့ တွေ့နေရတယ်။ စီးပွားရေးက တကယ့်ကို အကျပ်အတည်းမှာ ဖြစ်နေတယ်ဆိုတာကို ငြင်းလို့မရဘူး။ အိမ်လခတွေ တိုးမြင့်လာတယ်။ ရလာတဲ့ဝင်ငွေနဲ့ မမျှတော့ဘဲ တချို့ဆိုရင် စပေါ်တောင် မတင်နိုင်တော့ဘူး။ တစ်လတစ်ခါရှင်းနဲ့ နေရတဲ့ပုံစံ တွေ တွေ့နေရတယ်။ ဒါဘာကိုပြတာလဲဆိုရင် လက်ရှိ စီးပွားရေးအကျပ်အတည်းက ငြင်းဆန်လို့ မရဘူးဆိုတာပဲ။ နောက်တစ်ချက် အခြေခံလူတန်းစားတွေကြားမှာ ကြက်ဥကအစဆန်အဆုံး အောက်ခြေကုန်ဈေးနှုန်းတွေ တက်လာတယ်။ အခြေခံ လူတန်းစားတွေက ခါးကုန်း အောင် ခံနေရပြီး အစိုးရတာဝန်ရှိတဲ့လူတွေက ကုန်ဈေးနှုန်း မတက်ပါဘူး။ စီးပွားရေး တိုးတက်ပါတယ် မြင့်မားလာပါတယ်ပြောနေတော့ ပြည်သူတွေ အခြေခံလူတန်းစားတွေက ဘယ်လို ပြောရတော့မလဲ''ဟု နိုင်ငံရေးပါတီဖြစ်မြောက် ရေး ရန်ကုန်တိုင်းဒေသကြီးတာဝန်ခံ ဦးမျိုးခင် (မုန်းခက်)က ပြောဆိုသည်။

သို့သော် ပြီးခဲ့သည့် ရက်ပိုင်းအတွင်းက ရန်ကုန်တိုင်းဒေသကြီးဝန်ကြီးချုပ် ဦးဖြိုးမင်းသိန်းက BBC သတင်းဌာနှင့် သီးသန့် တွေ့ဆုံစဉ် ''ကျွန်တော့်အနေနဲ့ မြင်တာကတော့ ကုန်ဈေးနှုန်း မြင့်တက်လာမှုဆိုတဲ့အခြေအနေမှာ အခြေခံစားကုန်တွေ အများကြီး ပြောင်းလဲသွားတာမျိုးတော့ သိပ်မရှိပါဘူး။ ဒါပေမဲ့ ဒီကုန်ဈေးနှုန်းကို တည်ငြိမ်နိုင်ဖို့အတွက်ကတော့ ကျွန်တော်တို့ ထုတ်ကုန်ရယ် ဝယ်ယူနိုင်တဲ့ စွမ်းအားတွေရယ်၊ လူတွေရဲ့ သုံးစွဲနိုင်မှုအခြေအနေတွေကို ချိန်ရမှာဖြစ်ပါတယ်။ နောက်တစ်ချက်ကတော့ ငွေကြေးတန်ဖိုးတည်ငြိမ်မှုရအောင် ဆောင်ရွက်သွားရမှာ ဖြစ်ပါတယ်''ဟု ပြောဆိုခဲ့သည်။ ထိုကဲ့သို့ ပြောဆိုမှုအပေါ် ပြည်သူများ၏ဝေဖန်မှု များစွာထွက်ပေါ်ခဲ့သည်။ အခြေခံစားသောက်ကုန်ဈေးကွက်အတွင်း၌မူ ဆန်အမျိုးအစားပေါ်မူတည်၍ တစ်အိတ်လျှင် ပျမ်းမျှကျပ် ၁ဝဝဝ မှ ၂ဝဝဝ ဝန်းကျင် ခန့်အထိ မြင့်တက်မှုရှိခဲ့သလို အာလူး၊ ကြက်သွန်၊ ငရုတ်၊ ဆီ စသည်တို့မှာလည်း အနည်းငယ်စီ မြင့်တက်လာလျက်ရှိကြောင်း ဈေးကွက်အတွင်းမှ သိရသည်။

''တစ်ခုချင်းပြောမယ်ဆိုရင်တော့ မပြောပလောက်ဘူးပေါ့။ ဒါပေမဲ့ တစ်နေ့စာဝယ်တဲ့ စရိတ်မှာတော့ ကုန်ကျစရိတ်ပိုလာတယ်။ ငါးဆယ်တက် တစ်ရာတက်ကနေ မိသားစု တစ် နေ့တာ စားသောက်စရိတ်အတွက် ပေါင်းလိုက်ရင် အရင်ကလိုဈေးနှုန်းနဲ့ မရတော့ဘူး။ ဆန်ဆိုလဲ အရင်က အနည်းဆုံးတစ်အိတ်ကို ၃၇ဝဝဝ လောက် ရောင်းတဲ့ဟာက အခုဆိုရင် ၄ဝဝဝဝ လောက်ရှိလာပြီ''ဟု ဂင်္ဂါဆန်ရောင်းဝယ်ရေးမှ ဒေါ်နီနီက ကုန်ဈေးနှုန်းအခြေအနေကိုတွက် ပြသည်။ အစိုးရအနေဖြင့် ဦးစားပေး ဆောင်ရွက်ရမည့် ကဏ္ဍပေါင်းများစွာရှိနေသော်လည်း မြေ ပြင်၌ အခြေခံပြည်သူများ ခံစားနေရသည့် ကုန် ဈေးနှုန်း မြင့်တက်လာမှု၊ ဝင်ငွေထွက်ငွေ မမျှတမှု၊ အလုပ်အကိုင်ရှားပါးခြင်း စသည့်အခြေအနေ အရပ်ရပ်ကို လေ့လာသုံးသပ်ကာ ဦးစား ပေး ဆောင်ရွက်သင့်ပေသည်။ ထို့အပြင် တိုင်း ပြည်၏ စီးပွားရေးအခြေအနေ ဦးမော့ရန်အတွက်လည်း သက်ဆိုင်ရာတာဝန်ရှိသူများအနေ ဖြင့် ဦးစားပေးဆောင်ရွက်ရမည့် အခန်းကဏ္ဍများကို အချိန်မီ ကိုင်တွယ်ဖြေရှင်းဆောင်ရွက် ခြင်းဖြင့် အရပ်သားအ စိုးရ၏ သမိုင်းမှတ်တိုင်အသစ်ကို ပြောင် မြောက်စွာရေးထိုးသင့်ပေသည်။




#theyangontimes
Share it:

Article

Business

Dollar

GDP

Gold

Kyats

Myanmar

Opinion

Post A Comment: