မြန်မာနိုင်ငံအပေါ် ကမ္ဘာ့ဘဏ်အကူအညီများ ရပ်ဆိုင်းလိုက်သည်ဆိုသောပြောဆိုချက်နှင့်ပတ်သက်၍ ဘင်္ဂလားဒေ့ရ်ှအစိုးရက တာဝန်ယူရမည်

Share it:
Photo - ကမ္ဘာ့ဘဏ် ဥက္ကဋ္ဌ ဂျင်ယွန်ကင်မ်နှင့် ဘင်္ဂလားဒေ့ရှ် ဘဏ္ဍာရေးဝန်ကြီး အေအမ်အေမူဟစ်တို့ ဇူလိုင် ၁ ရက်က တွေ့ဆုံခဲ့ကြစဉ်

ကမ္ဘာ့ဘဏ်သည် မြန်မာနိုင်ငံအပေါ် ဆက်လက်ကူညီသွားမည်ဖြစ်ပြီး ကမ္ဘာ့ဘဏ်က မြန်မာနိုင်ငံပေါ်ကူညီနေမှုများကို ရပ်ဆိုင်းလိုက်သည်ဆိုသော ပြောဆိုချက်နှင့်ပတ်သက်၍ ဘင်္ဂလားဒေ့ရ်ှနိုင်ငံအစိုးရက တာဝန်ယူရမည်ဟု ကမ္ဘာ့ဘဏ်၏ မြန်မာနိုင်ငံဆိုင်ရာ ပြန်ကြားရေးတာဝန်ခံ ဦးကျော်စိုးလင်းက ဇူလိုင် ၄ ရက်တွင် News Watch သို့ ပြောသည်။

နေရပ်စွန့်ခွာလာသည့် ဘင်္ဂါလီများကို မြန်မာနိုင်ငံက ပြန်လည်လက်ခံရေးအတွက် ဖိအားပေးမှုများ၏ အစိတ်အပိုင်းတရပ်အဖြစ် ကမ္ဘာ့ဘဏ်က မြန်မာနိုင်ငံအပေါ်ပေးနေသည့် အကူအညီများနှင့် ဆက်လက်ဆောင်ရွက်မည့်ကူညီမှုများကို ရပ်ဆိုင်းလိုက်သည်ဟု ဘင်္ဂလားဒေ့ရ်ှအစိုးရအဖွဲ့ ဘဏ္ဍာရေးဝန်ကြီး အေအမ်အေမူဟစ်က ဇူလိုင် ၁ ရက်တွင် ပြောဆိုခဲ့ကြောင်း ဘင်္ဂလားဒေ့ရှ် အစိုးရသတင်းဌာနဖြစ်သည့် Independent က ဖော်ပြခဲ့သည်။

''အဲဒီသတင်းက ဘင်္ဂလားဒေ့ရ်ှနိုင်ငံ အစိုးရဘက်က ထုတ်ပြန်တဲ့ သတင်းဖြစ်တယ်။ အဲဒီသတင်းအပေါ်မှာတော့ ကျွန်တော်တို့က မှတ်ချက်မပေးလိုဘူး။ ဘာဖြစ်လို့လဲဆိုတော့ ဒါဘင်္ဂလားဒေ့ရ်ှအစိုးရက ပြောတာဖြစ်တဲ့အတွက် သူတို့တာဝန်ယူရမှာ ဖြစ်ပါတယ်။ ကျွန်တော်တို့ဘက်က ပြောနိုင်တာကတော့ အဲဒီပြောတဲ့စကားသည် ကျွန်တော်တို့မြန်မာနိုင်ငံမှာ ဆောင်ရွက်နေတဲ့လုပ်ငန်းတွေအပေါ်မှာ ဘာမှအကျိုးသက်ရောက်မှုမရှိပါဘူး။ လုပ်နေဆဲ လုပ်ငန်းတွေကလည်း ဆက်ပြီးလုပ်နေတာဖြစ်သလို နောက်အသစ်ထပ်လုပ်ဖို့တွေလည်း ကျွန်တော်တို့ ဆွေးနွေးသွားဖို့ရှိပါတယ်''ဟု ဦးကျော်စိုးလင်းက ပြောသည်။

မြန်မာနိုင်ငံ၏ ငြိမ်းချမ်းရေး၊ လူမှု အသိုင်းအ၀ိုင်းများအကြား သဟဇာတဖြစ်ရေး၊ စီးပွားရေးပြုပြင်ပြောင်းလဲရေးအတွက် ဆက်လက်ကူညီသွားမည်ဟု ကမ္ဘာ့ဘဏ်၏ဒုတိယဥက္ကဋ္ဌက အတည်ပြုပြောကြားကြောင်း မြန်မာနိုင်ငံဆိုင်ရာ ကမ္ဘာ့ဘဏ်ရုံးက ဇူလိုင် ၄ ရက်တွင် ကြေညာချက်တရပ် ထုတ်ပြန်ခဲ့သည်။

ကမ္ဘာ့ဘဏ်၏ အရှေ့အာရှနှင့် ပစိဖိတ်ဒေသ ဒုတိယဥက္ကဋ္ဌ ဗစ်တိုးရီးယားကွာကွာသည် မြန်မာနိုင်ငံသို့ ဇူလိုင် ၈-၁၀ ရက်အတွင်း လာရောက်မည်ဖြစ်ကြောင်း၊ ခရီးစဉ်အတွင်း နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် အပါအ၀င် အစိုးရတာဝန်ရှိသူများ၊ ဖွံ့ဖြိုးရေးမိတ်ဖက်အဖွဲ့အစည်းများအပြင် အခြား သက်ဆိုင်ရာ အဖွဲ့အစည်းအသီးသီးနှင့် တွေ့ဆုံရန် စီစဉ်ထားပြီး မြန်မာနိုင်ငံနှင့် ကမ္ဘာ့ဘဏ်တို့ ပူးပေါင်းဆောင်ရွက်လျက် ရှိသည့် ဖွံ့ဖြိုးရေးလုပ်ငန်းများနှင့်စပ်လျဉ်း၍ ဆွေးနွေးသွားမည်ဖြစ်ကြောင်း၊ ကမ္ဘာ့ ဘဏ်၏ အပြည်ပြည်ဆိုင်ရာ ဖွံ့ဖြိုးရေးအသင်းရန်ပုံငွေဖြင့် မြန်မာနိုင်ငံအတွင်း ငြိမ်းချမ်းရေးတည်ဆောက်ရေးနှင့် လူမှုအသိုင်းအ၀ိုင်းများအကြား သဟဇာတဖြစ်ရေး ကြိုးပမ်းဆောင်ရွက်မှုများတွင် ပံ့ပိုးကူညီသွားနိုင်ရန် အဓိကဆွေးနွေးသွားမည်ဖြစ်ကြောင်း ယင်းထုတ်ပြန်ချက်တွင် ပါရှိခဲ့သည်။

ကုလသမဂ္ဂအထွေထွေအတွင်းရေးမှူးချုပ်နှင့် ကမ္ဘာ့ဘဏ်ဥက္ကဋ္ဌတို့သည် ဘင်္ဂလားဒေ့ရ်ှခရီးစဉ်အတွင်း သတင်းစာရှင်းလင်းပွဲတရပ်ပြုလုပ်ခဲ့ပြီး ယင်းသတင်းစာရှင်းလင်းပွဲတွင်လည်း မြန်မာနိုင်ငံအပေါ် ကူညီနေမှုများကို ရပ်ဆိုင်းရန်ပြောဆိုခဲ့ခြင်းမရှိဟု ၎င်းက ဆိုသည်။

''သေချာတာတခုကတော့ သတင်းထောက်တွေနဲ့ သူတို့သတင်းစာရှင်းလင်းပွဲ လုပ်ပါတယ်။ ကျွန်တော်တို့ ဥက္ကဋ္ဌရော၊ ကုလသမဂ္ဂအထွေထွေ အတွင်းရေးမှူးချုပ်ရောပေါ့နော်။ လုပ်တဲ့အခါမှာလည်း မြန်မာနိုင်ငံနဲ့ပတ်သက်ပြီးတော့မှ သူ့(ကမ္ဘာ့ဘဏ်ဥက္ကဋ္ဌ)ကို မေးသွားတာရှိတယ်။ မြန်မာနိုင်ငံနဲ့ပတ်သက်ပြီးလို့ ဘာတွေလုပ်ဖို့ရှိသလဲဆိုပြီးတော့ မေးသွားတဲ့အချိန်မှာလည်း မြန်မာနိုင်ငံမှာ လုပ်ငန်းတွေဆက်လုပ်မယ်လို့ပဲ ပြောသွားတာပါ။ ဆိုတော့ ဒါက ဘင်္ဂလားဒေ့ရ်ှနိုင်ငံအစိုးရက သူတို့ဖြစ်စေချင်သလို ဘယ်လိုပုံဖော်လဲတော့ ကျွန်တော်တို့လည်း နားမလည်ဘူးပေါ့။ သူတို့ဘက်က တာဝန်ယူရမယ့်စကားဖြစ်ပါတယ်''ဟု ၎င်းက ပြောသည်။

မြန်မာနိုင်ငံမှ နေရပ်စွန့်ခွာသွားသည့် ဘင်္ဂါလီများနှင့်ပတ်သက်၍ ကုလသမဂ္ဂ အထွေထွေအတွင်းရေးမှူးချုပ် ဂူတာရက်စ်နှင့် ကမ္ဘာ့ဘဏ်ဥက္ကဋ္ဌ ဂျင်ယောင်ကင်တို့သည် ဘင်္ဂလားဒေ့ရ်ှနိုင်ငံသို့ ဇူလိုင် ၁ ရက်မှ ၂ ရက်ထိ သွားရောက်ခဲ့ကြသည်။

မင်းထင်
News Watch
Share it:

Article

Bangali

Bangladesh

Myanmar

Political

World Bank

Post A Comment: