နိုင်ငံခြားသားများသာ ကစားခွင့်ရှိမည့် ကာစီနိုရုံများတည်ထောင်ခြင်း၊ ဖွင့်လှစ်ခြင်းကို သတ်မှတ်ချက်များနှင့်အညီ ပြည်ထောင်စုအစိုးရအဖွဲ့က ခွင့်ပြုနိုင်မည့် လောင်းကစားဥပဒေကြမ်းအား ပြည်သူ့လွှတ်တော်သို့ တင်သွင်း

Share it:


နိုင်ငံခြားသားများသာ ကစားခွင့်ရှိမည့် ကာစီနိုရုံများ တည်ထောင်ခြင်း၊ ဖွင့်လှစ်ခြင်း ကို သတ်မှတ်ချက်များနှင့်အညီ ပြည်ထောင်စုအစိုးရအဖွဲ့က ခွင့်ပြုနိုင်မည့် လောင်းကစားဥပဒေကြမ်းအား ပြည်သူ့လွှတ်တော်သို့ တင်သွင်းခဲ့ကြောင်း သိရသည်။

နေပြည်တော်၌ သြဂုတ် ၂၁ ရက်က ပြုလုပ်သော ဒုတိယအကြိမ် ပြည်သူ့လွှတ်တော် န၀မပုံမှန်အစည်းအဝေး ၁၁ ရက်မြောက်တွင် ၂၀၁၈ ခုနှစ် လောင်းကစားဥပဒေကြမ်းကို ပြည်သူ့လွှတ်တော်၊ ပြည်သူ့ရေးရာ စီမံခန့်ခွဲမှု ကော်မတီက တင်သွင်းခဲ့ခြင်းဖြစ်ပြီး ဥပဒေကြမ်းနှင့် စပ်လျဉ်း၍ ဥပဒေကြမ်းကော်မတီ၏ အစီရင်ခံစာအား ဖတ်ကြားရှင်းလင်းခဲ့ခြင်း ဖြစ်သည်။


“ဒီနေ့ တင်သွင်းတဲ့ ဥပဒေမှာ အဓိကက ကာစီနိုနဲ့ထီပေါ့။ ဒီနှစ်ခုကို ခြွင်းချက်ပေးချင်တဲ့ သဘောနဲ့ ဒီဥပဒေကို ပြဋ္ဌာန်းခြင်း ဖြစ်ပါတယ်။ အခုလောလောဆယ်မှာတော့ ပြည်ထောင်စုအစိုးရအဖွဲ့ရဲ့ အတည်ပြုချက်နဲ့ပဲ ခွင့်ပြုပေးမှာပါ။ တိုင်းနဲ့ပြည်နယ်တွေမှာ ရှိနေတဲ့ အစိုးရအဖွဲ့က တင်ပြတဲ့အပေါ်မှာ မူတည်ပြီးတော့ ပြည်ထောင်စုအစိုးရအဖွဲ့ရဲ့ သဘောတူညီချက်နဲ့ပဲ သဘောတူညီဖို့ရှိပါတယ်။ ဒါပေမဲ့ အခုလောလောဆယ်မှာက ကင်းလွတ်ခွင့် ဥပဒေအသစ်တစ်ရပ်ရေးဆွဲနိုင်ဖို့က ဒီဥပဒေမှာ ကင်းလွတ်ခွင့်ပေးတဲ့ သဘောမျိုးပါ။ ဥပဒေမှာ တစ်ခါတည်း ရေးထားပါတယ်။ မြန်မာနိုင်ငံသားများကို ခွင့်မပြုပေးထားပါဘူး။ နိုင်ငံခြားသားတွေကိုပဲ သီးခြားခွင့်ပြုတဲ့ ဥပဒေတစ်ခုဖြစ်ပါတယ်” ဟု ပြည်သူ့လွှတ်တော် ဥပဒေကြမ်းကော်မတီအတွင်းရေးမှူး ဦးကျော်စိုးလင်းက ပြောကြားသည်။

ကာစီနိုများနှင့် ပတ်သက်၍  သတ်မှတ်ထားသော ယဉ်ကျေးမှု နယ်မြေများတွင် ခွင့်ပြုပေးမည် မဟုတ်ဘဲ နိုင်ငံခြားသားများ ၀င်ထွက်သွားလာရန် လွယ်ကူသည့် နေရာများကို အဓိကထားကာ နိုင်ငံတကာ ခရီးသွားလာရေးနှင့် မြန်မာ့စီးပွားရေးအတွက် ရည်ရွယ်ကာ ၂၀၁၈ ခုနှစ် လောင်းကစားဥပဒေကြမ်းကို ရေးဆွဲထားခြင်းဖြစ်ကြောင်း ၎င်းက ဆိုသည်။

ပြည်သူ့လွှတ်တော်၊ ပြည်သူ့ရေးရာ စီမံခန့်ခွဲမှု ကော်မတီက တင်သွင်းသော ၂၀၁၈ ခုနှစ် လောင်းကစားဥပဒေကြမ်းတွင် အခန်းခြောက်ခန်းနှင့် အပိုင်းပေါင်း ၂၃ ပိုဒ် ပါရှိသော်လည်း ဥပဒေကြမ်းကော်မတီ၏ စီစစ်ချက်အရ အသစ်ဖြည့်စွက်ချက်အဖြစ် အခန်း (၇) အပိုဒ် ၂၂ တွင် အောင်ဘာလေထီကို ပြည်ထောင်စု အစိုးရအဖွဲ့က တာဝန်ပေးအပ်သည့် စီမံကိန်း နှင့် ဘဏ္ဍာရေးဝန်ကြီးဌာန၊ ပြည်တွင်းအခွန်များ ဦးစီးဌာနကသာ လုပ်ကိုင်ဆောင်ရွက်ခွင့် ရှိသည်နှင့် အပိုဒ် ၂၃ တွင် ပြည်ထောင်စုအစိုးရ အဖွဲ့သည် ကာစီနိုရုံ (သတ်မှတ်ချက်များနှင့် အညီမှတ်ပုံတင်ထားပြီး ခွင့်ပြုထားသည့်နေရာ သို့မဟုတ် အဆောက်အအုံ၌သာ ဖွင့်လှစ်ခွင့်ပြုထားသည့် နိုင်ငံခြားသားများသာ သီးသန့်လောင်းကစားခွင့်ရှိသော နေရာ) တည်ထောင်ခြင်း၊ ဖွင့်လှစ်ခြင်းကို သတ်မှတ်ချက်များနှင့်အညီ စိစစ်ခွင့်ပြုနိုင်သည်ဟု ၂၀၁၈ ခုနှစ် လောင်းကစားဥပဒေကြမ်းနှင့် စပ်လျဉ်း၍ အဆိုပြုပြဋ္ဌာန်းချက်နှင့် ပြည်သူ့လွှတ်တော် ဥပဒေကြမ်းကော်မတီ၏ စိစစ်ချက်ဇယားတွင် ပါရှိသည်။

၂၀၁၈ ခုနှစ် လောင်းကစားဥပဒေကြမ်းကို ပြည်သူ့လွှတ်တော် ပြည်သူ့ရေးရာ စီမံခန့်ခွဲမှု ကော်မတီသည်  မျက်မှောက်ခေတ် စနစ်နှင့် ကိုက်ညီသော လောင်းကစား ဥပဒေအသစ် ပေါ်ပေါက်လာစေရန်၊ ခေတ်ကာလအလျောက် ဆန်းသစ်ပေါ်ပေါက်လာသော လောင်းကစားနည်းသစ်များကို ထိန်းချုပ်စေရန်နှင့် အောင်ဘာလေထီနှင့် ကာစီနိုရုံများကဲ့သို့သော ကံစမ်း၊ ဥာဏ်စမ်းကစားမှုများကို နိုင်ငံသားများ၏ အကျိုးစီးပွား မထိုက်စေဘဲ ဥပဒေပြု၍ ခွင့်ပြုနိုင်ရန် ရည်ရွယ်ချက်များဖြင့် ရေးဆွဲလာခြင်းဖြစ်ကြောင်း ပြည်သူ့လွှတ်တော်၊ ပြည်သူ့ရေးရာစီမံခန့်ခွဲမှုကော်မတီ အဖွဲ့ဝင် ဒေါက်တာလင်းလင်းကျော်က ဆိုသည်။

လက်ရှိကျင့်သုံးနေသော ၁၉၆၈ ခုနှစ် လောင်းကစားဥပဒေည် မြန်မာ့ဆိုရှယ်လစ်လမ်းစဉ်ပါတီခေတ်က ရေးဆွဲပြဋ္ဌာန်းခဲ့သော ဥပဒေဖြစ်ရာ လက်ရှိအုပ်ချုပ်ရေးပုံစံနှင့် ကိုက်ညီမှုမရှိခြင်း၊ ဥပဒေပါထောင်ဒဏ် ငွေဒဏ်များမှာ ယခုကာလနှင့် ကိုက်ညီမှုမရှိခြင်း၊ မြန်မာနိုင်ငံရဲတပ်ဖွဲ့၏ ဖွဲ့စည်းပုံအင်အား ပြောင်းလဲလာခြင်းနှင့် ခေတ်မီနည်းပညာများ တိုးတက်ပေါ်ပေါက်လာခြင်းတို့ကြောင့် လက်တွေ့ကျကင့်သုံးရန် အခက်အခဲရှိကြောင်း ဒေါက်တာလင်းလင်းကျော်က ပြောကြားသည်။

စည်သူ
Eleven Media Group
Share it:

Featured

Foreign

LocalNews

News

Sport

Post A Comment: