ဇိကုပ်ပြီး နတ်ပြည်တင်ရတော့မည့် မြန်မာ့စီးပွားရေး

Share it:


မြန်မာ့စီးပွားရေးတက်သလား၊ ကျသလား ဆိုသောမေးခွန်းသည် ယခုနှစ်တွင်း အကြားရဆုံး မေးခွန်းဖြစ်ပြီး ယခုတလော အကြားရ ပိုစိတ်လာသည်။ စီးပွားတက်သည်၊ ကျသည် အသာထား။ မြန်မာ့စီးပွားရေးကို ထိုသို့ စိုးရိမ်သူများလာခြင်း ကိုယ်တိုင်က စိုးရိမ်စရာ။ 

စီးပွားရေးသည် ယုံကြည်မှုပေါ် အခြေခံသည်။ စီးပွားကျသည်ဟု လူတွေ ထင်လာလျင် တကယ်ကျသွားနိုင်သည်။ စီးပွားကျသည်ထင်လျင် အသုံးစရိတ်လျှော့မည်၊ ၀ယ်သုံးတာလျှော့မည်၊ လုပ်ငန်းတိုးချဲ့ရန် အကြံ ခဏရပ်ထားလိမ့်မည်။ ထိုအခါ လုပ်ငန်းတွေ အရောင်းကျမည်၊ အလုပ်တွေပြုတ်မည်။ “ဥပါဒါန်ကြောင့် ဥပဒ်ရောက်သည်” ဆိုသော စကားမှာ စီးပွားရေးတွင် တကယ်မှန်သည်။ 

ကမ္ဘာ့ဘဏ်၊ အပြည်ပြည်ဆိုင်ရာငွေကြေးရန်ပုံငွေအဖွဲ့၊ အာရှဖွံ့ဖြိုးရေးဘဏ် တည်းဟူသော အပြည်ပြည်ဆိုင်ရာ ငွေကြေးအဖွဲ့အစည်းကြီးများ၏ ခန့်မှန်းချက်များအရ မြန်မာ့စီးပွားရေးတိုးတက်နှုန်းသည် ၆ရာခိုင်နှုန်းနှင့် ၇ရာခိုင်နှုန်းအကြားရှိနိုင်သည်။ 
၆ရာခိုင်နှုန်း ဆိုလျင်ပင် တိုးတက်မှုနှုန်း ကောင်းသည်။ တဘက်ကကြည့်ပြန်လျင် မြန်မာနိုင်ငံ၏ စီးပွားရေးသည် ဖွံ့ဖြိုးဆဲ စီးပွားရေး developing economy ဖြစ်ရာ အတော်နိမ့်သဖြင့် တက်မည်ဆိုလျင် ပိတ်နေသောရေမြောင်းမှ အမှိုက်ကို ဖယ်လိုက်သကဲ့သို့ များများတက်စရာရှိသည်။ အမေရိကန်ပြည်ထောင်စု၊ ဗြိတိန်စသည့် ဖွံ့ဖြိုးပြီး တည်ငြိမ်ပြီး စီးပွားရေးများမှာမူ တစ်ရာခိုင်နှုန်း၊ နှစ်ရာခိုင်နှုန်းတက်လျင်ပင် ကျေနပ်လောက်သည်။ မြန်မာနိုင်ငံအနေဖြင့် ပိုလုပ်လျင် ပိုတက်နိုင်ရာ တိုးတက်မှု ရာခိုင်နှုန်းလေးကို ကျေနပ်ပြီး မိန်းမောနေစရာ မဟုတ်။ အိမ်နီးချင်းနိုင်ငံများကို ကြည့်လျင်ပင် မြန်မာသည် အတော်ပြတ်ကျန်ခဲ့သည့်အတွက် ယခုထက် တိုးတက်မှုနှုန်း ၂ဆဖြစ်လျင်ပင် တော်တော်ကြာအောင် လိုက်ယူရဦးမည်။ အိမ်နီးချင်းများကို မကြည့်ဘဲ စီးပွားရေး မြို့တော် ရန်ကုန်မြို့တွင်း ကြည့်လျင်ပင် လိုအပ်ချက်များစွာ မြင်နေရသည်။

နိုင်ငံ့စီးပွားရေးတွင် လုပ်ငန်းနယ်ပယ်ပေါင်းများစွာရှိရာ ကျသည့် လုပ်ငန်းနယ်ပယ်ရှိမည်ဖြစ်သလို တက်သည့် လုပ်ငန်းနယ်ပယ်လည်း ရှိမည်။ တက်သည့်လုပ်ငန်းနယ်ပယ်မှာ ဝေးဝေးပြေးကြည့်ရန်မလို။ ဆက်သွယ်ရေးနယ်ပယ် telecom sector ဖြစ်သည်။ operator အသစ် My Tel ပင် ဈေးကွက်တွင်း ထပ်ဝင်လာသေးသည်။

ထိသောနယ်ပယ်များကို မှန်းကြည့်မည်။ ခရီးသွားလုပ်ငန်းထိနိုင်သည်။ အိမ်ခြံမြေဈေးကွက် ထိနိုင်သည်။ ခရီးသွားလုပ်ငန်းမှာ ရခိုင်တည်းဟူသော နိုင်ငံရေးကြောင့်ပါသလို သွားရာလာရာတည်းရာခိုရာတွင် အားနည်းချက်များ နှစ်များစွာစုလာခြင်းကြောင့်လည်းပါနိုင်သည်။ အိမ်ခြံမြေဈေးကွက်သည် ဈေးကစားသောကြောင့်လည်းကောင်း၊ အစိုးရအပြောင်းအလဲ တံခါးအဖွင့်ကို မျှော်လင့်ချက်ကြီးသည့်အတွက်ကြောင့်လည်းကောင်း ဖြစ်သင့်သည့်ဈေးထက် များစွာတက်သွားသည်။ ယခုအခါ ပုံမှန်ဈေးသို့ ပြန်ရောက်ရန် ဈေးကွက်က သူ့သဘောသူဆောင် ပြန်ပြင်နေခြင်းလည်းဖြစ်သည်။ အိမ်ခြံမြေဈေးကွက် နဂိုပုံမှန် ၀ယ်လိုအားရောင်းလိုအား မျှခြေပြန်သွားနေချိန်တွင် ပိုက်ဘောမိနေသူများစွာ ရှိသည်။ ပိုက်ဘောမိသူများတွင် စီးပွားရေးလုပ်ငန်းရှင် အများအပြား ပါဝင်နေသည့်အတွက် မြန်မာ့စီးပွားရေးအပေါ် သက်ရောက်မှု ရှိနေသည်။ 

တဖန် အိမ်ခြံမြေဈေးကွက်နှင့် တိုက်ရိုက်ချိတ်ဆက်နေသည်မှာ ဘဏ်များဖြစ်သည်။ မြန်မာဘဏ်များသည် ငွေချေးသည့်အခါ အိမ်ခြံမြေကို အပေါင်ပစ္စည်းအဖြစ် လက်ခံခဲ့သည်ကများသည့်အတွက် အိမ်ခြံမြေဈေးထိုးဆင်းသည့်အခါ ဘဏ်များလည်း အထိုက်အလျောက် ပိုက်ဘောမိကြမည်။ မြန်မာဘဏ်ပိုင်ရှင်များသည် ဘဏ်တစ်ခုတည်း လုပ်ကြခြင်းထက် အခြားစီးပွားရေးများလည်း တွဲလုပ်ကြသည့်အတွက် သူတို့ ဘဏ်တွင် မိနေလျင် အခြားနေရာများသို့လည်း မီးခိုးကြွက်လျှောက်ရိုက်မည်ဖြစ်သည်။ ထိုအချက်များကို သိသောကြောင့်လားမသိ ဗဟိုဘဏ်ကလည်း ဘဏ်များ ခိုင်မာတောင့်တင်းစေရန် နိုင်ငံတကာတွင် သုံးစွဲနေသည့် စည်းမျဉ်းစည်းကမ်းများဖြင့် တိုက်တိုက်တွန်းတွန်း စည်းကမ်းထိန်းသိမ်းနေသည်။ ထိုအခါ အော်သည့်ဘဏ် အော်ကြသည်။ ဘဏ်ပိုင်ရှင်များသည် အကောင်ကြီးအမြီးရှည်များဖြစ်သဖြင့် သြဇာလည်းကြီးသည်။ သိမ်မွေ့သော ပြဿနာဖြစ်မှန်း ဗဟိုဘဏ်ကလည်း သဘောပေါက်ပုံရသည်၊ မလျော့မတင်းနည်းဖြင့် သွားရန် ကြိုးစားနေသည်ဟု မြင်သည်။

လုပ်ငန်းနယ်ပယ်အလိုက် လွတ်လပ်သော သုံးသပ်ချက်များ ထွက်ပေါ်ရန်လိုသည်။ ယခု စာရေးသူ သုံးသပ်ခဲ့သော နယ်ပယ်များသည် မြင်သာထင်သာနယ်ပယ် တစ်ခုနှစ်ခုသာဖြစ်သည်။ လူမသိသူမသိအားကောင်းသော နယ်ပယ်များ ရှိနေနိုင်သလို ပြိုလဲနေသော နယ်ပယ်များလည်း ရှိနိုင်သည်။ 

နိုင်ငံရေး

စီးပွားရေးအတက်အကျ ငြင်းခုန်ပွဲသည် တဖြည်းဖြည်းနှင့် နိုင်ငံရေးငြင်းခုန်ပွဲဘက်သို့ အသွင်ပြောင်းလာသည်။ စီးပွားရေးကို စီးပွားရေးဆန်ဆန်ပြောကြခြင်းထက် နိုင်ငံရေး ဆန်ဆန်ပြောခြင်းဘက် ကဲလာသည်။ မင်းဘက်၊ ငါ့ဘက် ဖြစ်လာသည်။ စီးပွားရေးကျသည် ပြောမိသူများသည် ဒီမိုကရေစီအစိုးရ၏ရန်သူဖြစ်သွားသည်။ ခရိုနီများဟု အပြောခံရသည်။ စီးပွားရေးတက်သည် ပြောမိသူများသည် အစိုးရကို ဖာသူ၊ သာပေါင်းများ ဖြစ်သွားကြသည်။ ၀ါးလုံးရှည်ဖြင့် သိမ်းရမ်းခံရသည့်အတွက် ဟိုဘက် ဒီဘက်မဟုတ်ဘဲ ကိုယ်မြင်ရာ ကိုယ်ပြောသူများအတွက် နေရာမရှိတော့။ တက်သည်ပြောသူရော ကျသည်ပြောသူရော မြန်မာ့စီးပွားရေးကို တိုးတက်စေချင်သူများဟုမူ ကျွန်တော် သဘောပေါက်သည်။ သင်္ဘောမြုပ်လျင် အားလုံးပါသွားမည်မဟုတ်လား။ 

နိုင်ငံရေး အငြင်းအခုန်ဘက်သို့ ပြောင်းပြောင်းသွားခြင်းသည် ရွေးကောက်ပွဲ နီးလာခြင်း၊ လက်ရှိအစိုးရသက်တမ်းတွင် အချိန်သိပ်မကျန်တော့ခြင်းကိုလည်း ပြနေသည်။ နိုင်ငံ့ စီးပွားရေး စီမံခန့်ခွဲရာတွင်၊ အုပ်ချုပ်ရာတွင် လူမကြိုက်သော်လည်း လုပ်သင့်လုပ်ထိုက်သည်များကို လုပ်ရသည်မှာ ဓမ္မတာဖြစ်သည်။ မြန်မာနိုင်ငံကဲ့သို့ အမှားများစွာကို အမှန်ပြင်နေရသည့်နိုင်ငံတွင် လူမုန်းခံပြီး လုပ်ရမည့် လုပ်သင့်သောအရာ ပိုများသည်။ ရွေးကောက်ပွဲ ယခုထက် ပိုနီးလာလျင် မဲမရမည်စိုးပြီး စီးပွားရေးတွင် ဆေးခါးကြီးတိုက်ဖို့ လိုသည်များမတိုက်နိုင်မှာ စိုးရသည်။ ယခုလူကြိုက်သော်လည်း ရေရှည်မကောင်းသည့် လူပြိန်းကြိုက်မူဝါဒများ populist policies များသည် မဲမျက်နှာဖြင့် ထိပ်ရောက်လာမှာ စိုးရသည်။ 

အဖြေ

ပထမဆုံးမှာ အစိုးရအနေဖြင့် စီးပွားရေးကို ယခုထက်ပိုအာရုံစိုက်ရန် ဖြစ်သည်။ စီးပွားရေးဆိုင်ရာဝန်ကြီးများ အနေဖြင့်သာ မကဘဲ အစိုးရအဖွဲ့တစ်ရပ်လုံးသည် နိုင်ငံ့စီးပွားတိုးတက်ရေးကို ဦးထိပ်ထားရန်လိုသည်။ ပြည်ထောင်စု/ ပြည်နယ်တိုင်းဒေသကြီး အစိုးရအဖွဲ့၏ ဆုံးဖြတ်ချက်များ မှန်ကန်ခြင်း၊ မြန်ဆန်ခြင်းတို့သည် နိုင်ငံ့စီးပွားရေးပေါ် တိုက်ရိုက်သက်ရောက်သည်။ 

enabling environment ခေါ် စီးပွားရေးရေခံမြေခံကောင်းအောင် ဖန်တီးပေးရမည်။ အခွန်ပေးခြင်း၊ ချေးငွေရယူခြင်း၊ လမ်းပန်းဆက်သွယ်ရေး စသည်တို့ လွယ်ကူအောင် ဆောင်ရွက်ပေးရုံသာမက လူ့အဖွဲ့အစည်း၏ စိတ်ပိုင်းဆိုင်ရာကိုပါ ပြုပြင်ပေးမှ စီးပွားရေး ရေခံမြေခံကောင်း ဖြစ်မည်။ စီးပွားရေးလုပ်သူဆိုသည်နှင့် လူဆိုးလူကောင်းမခွဲဘဲ တစ်တန်းတစ်စားတည်း မကောင်းမြင်ကြခြင်းသည် အစိုးရ၀န်ထမ်းများအတွင်းတွင်ရော သာမန်ပြည်သူလူထုများအတွင်းတွင်ပါ လျော့ပါးသွားရန်လိုသည်။ စီးပွားရေးလုပ်သူများတွင် ခရိုနီ၊ ၀ိသမလောဘသား ရှိသလို ကောင်းရောင်းကောင်းဝယ် လုပ်စားပြီး ပြည်သူများအတွက် လိုအပ်သည့် ၀န်ဆောင်မှု၊ ကုန်များ ထုတ်လုပ်နေသူများလည်း ပါမည်ဖြစ်သည်။ စီးပွားရေးလုပ်ငန်းများ မထူထောင်နိုင် မခိုင်မာ မတောင့်တင်းဘဲနှင့် မြန်မာ့စီးပွားရေးတက်မည်မဟုတ်ရာ စီးပွားရေးလုပ်ငန်းရှင်များအပေါ် အမြင်ပြောင်းရန်လိုသည်။ 

တစ်ဘက်တွင် ကြိုးနီစနစ်သည် မြန်မာတစ်နိုင်ငံလုံးကို လက်နောက်ပြန်ကြိုးချည်ပြီး ပြေးခိုင်းနေသကဲ့သို့ ဖြစ်နေသေးသည်။ Ease of Doing Business Ranking ခေါ် စီးပွားရေးလုပ်ရကိုင်ရလွယ်ကူမှု အဆင့်သတ်မှတ်ချက်တွင် နိုင်ငံပေါင်း ၁၉၀ ပါဝင်သည့်အနက် မြန်မာသည် ၁၇၁တွင် ရှိနေခြင်းက ထိုအချက်ကို သက်သေပြသည်။ “ထစ်ထားလေ ငွေရလေ” ဟုသာ သဘောထားလျင် ကြိုးများ များလာရန်သာရှိသည်။ ချည်ထားသော ကြိုးအချို့ကို ဖြည်ပေးလိုက်ရုံဖြင့် မြန်မာသည် ပိုမြန်မြန်ပြေးနိုင်မည်။ 

ပြည်တွင်းထုတ် Made in Myanmar များ အားပေးဖို့ လိုသည်။ ပြည်တွင်းလုပ်ငန်းများ လုပ်ငန်းချဲ့နိုင်၊ လုပ်အားပိုငှားနိုင်လျင် နိုင်ငံ့ စီးပွားတက်မည်။ မြန်မာနိုင်ငံ၏ ပြည်တွင်းဈေးကွက်သည် လူဦးရေ ၅၁သန်း ၅၂သန်းရှိသဖြင့် မသေးလှ။ စီးပွားရေးတက်အောင် နှိုးဆွပေးနိုင်စွမ်းရှိသည်။ ပြည်တွင်းထုတ်အားပေးပါ ဆိုသဖြင့် ဈေးကြီး ပစ္စည်းညံ့များကို ၀ံသာနုစိတ်ဖြင့် ကျိတ်မှိတ်အားပေးရန်မဟုတ်။ ဈေးသင့်တင့်သော အရည်အသွေးမီသော ပြည်တွင်းထုတ်များကို အားပေးရန် ဆော်သြလိုခြင်းဖြစ်သည်။ အထက်တွင် ဖော်ပြခဲ့သည့် စီးပွားရေး ရေခံမြေခံကောင်းပေါ်လာလျင် Made in Myanmar များ၏ အရည်အသွေးတက်လာမည်။ 

နိုင်ငံခြားရင်းနှီးမြုပ်နှံမှုများကို ခွင့်ပြုပြီးလျင် ယင်းလုပ်ငန်းများ လုပ်ငန်းမြန်မြန်စနိုင်အောင်၊ စက်ရုံတည်နိုင်အောင်၊ လူမြန်မြန်ခေါ်နိုင်အောင် တိုက်တွန်းအားပေးရန်လိုသည်။ ယင်းတို့ ရင်ဆိုင်ရသည့် ကြိုးနီများကို ၀ိုင်းဝန်းဖြတ်တောက်ပေးမည့် အစီအမံတစ်ခု ဆောင်ရွက်ရန်လိုသည်။ ယင်းတို့ လုပ်ငန်းစရန် နှေးနေလျင် နိုင်ငံခြားရင်းနှီးမြုပ်နှံသူတို့ အတွက်သာ မကောင်းခြင်းမဟုတ်၊ မြန်မာနိုင်ငံအတွက်လည်းမကောင်း။ လုပ်ငန်းမြန်မြန်စနိုင်လျင် နိုင်ငံသားများ မြန်မြန်အလုပ်ရမည်၊ ပြည်ပမှ ငွေများ မြန်မြန် ၀င်လာမည်၊ မြန်မာပြည်ထွက် ထွက်ကုန်များ မြန်မြန်ပေါလာမည်၊ ပိုကောင်းလာမည်။

ယခုအချိန်သည် မြန်မာ့စီးပွားရေးကို ဇိကုပ်ပြီး နတ်ပြည်တင်ရမည့် အချိန်ဖြစ်သည်။ တက်သလား၊ ကျသလား ငြင်းခုန်ကြခြင်းထက် ခါးတောင်းကျိုက်ကာ အစိုးရ ပြည်သူ ၀ိုင်းရုန်းကြရမည့် အချိန်ရောက်ပြီ။ 

ဇေယျသူ

Share it:

Article

Business

Featured

Myanmar

Opinion

Post A Comment: