ဝလုံးဝိုင်းအောင် ရေးကြမလား

Share it:


မကြာခင် စက်တင်ဘာ ၃ ရောက်တော့မယ်။ ကိုဝလုံးတို့ ရိုက်တာသတင်းထောက်နှစ်ဦးအမှုက အပြီးသတ်အမိန့်ချတော့မယ်။ အမှုက ကွင်းလုံးကျွတ်လွတ်မလား၊ ပြစ်ဒဏ်တစ်ခုခုချမှာလား။ စိတ်မချမ်းသာဖွယ် စောင့်နေကြရတဲ့အချိန်တွေပါပဲ။

ကိုဝလုံးတို့ကို စွဲထားတဲ့ဥပဒေပုဒ်မက ပြင်းပါတယ်။ ၁၉၂၃ ခုနှစ် မြန်မာနိုင်ငံ အစိုးရလျှို့ဝှက်ချက်များအက်ဥပဒေ ပုဒ်မ ၃ ပုဒ်မခွဲ ၁(ဂ) ဖြစ်ပါတယ်။ မြန်မာနိုင်ငံရဲ့ သတင်းမီဒီယာသမိုင်းမှာ ပထမဆုံး ဒီပုဒ်မနဲ့ တရားစွဲခံရခြင်းပါပဲ။

မူရင်းဥပဒေပြဋ္ဌာန်းချက်ကဒီလိုပါ။

ပုဒ်မ ၃။ ။ သူလျှိုလုပ်မှုအတွက် ပြစ်ဒဏ် (၁) မည်သူမဆို နိုင်ငံတော်လုံခြုံရေးကိုဖြစ်စေ၊ နိုင်ငံအကျိုးကိုဖြစ်စေ ထိခိုက်စေသောရည်ရွယ်ချက်ဖြင့်-(ဂ) ရန်သူအား တိုက်ရိုက်ဖြစ်စေ၊ သွယ်ဝိုက်၍ဖြစ်စေ အသုံးဝင်စေရန်ကြံရွယ်၍ အစိုးရလျှို့ဝှက်သင်္ကေတ (Code) ကင်းစကား ဝှက် (Password) ပုံကြမ်းအစီအစဉ် နမူနာပုံစံ ဆောင်းပါးမှတ်စု သို့မဟုတ် အခြားစာရွက်စာတမ်းအမှတ်အသား သို့မဟုတ် သတင်းကိုရယူခြင်း စုဆောင်းခြင်း၊ ရေးမှတ်ခြင်းပြုလျှင် သို့မဟုတ် သူတစ်ပါးဆက်သွယ်သိရှိစေလျှင်သော်လည်းကောင်း။

ထိုပြစ်မှုသည် တပ်မတော်လုပ်ငန်း လက်နက်တိုက် ကြည်းတပ် ရေတပ် လေတပ်ဆိုင်ရာ တည်ရှိရာ ချထားရာနေရာတစ်ခုခု ကြည်းတပ် ရေတပ် လေတပ်ဆိုင်ရာ မိုင်းတွင်းအလုပ်ရုံသင်္ဘောကျင်းစခန်း သင်္ဘောနှင့် လေယာဉ်တစ်ခုခုနှင့် သက်ဆိုင်လျှင် ထောင်ဒဏ် ၁၄ နှစ် အထိ ချမှတ်ခြင်းခံရမည်။ အခြားပြစ်မှုနှင့် သက်ဆိုင်လျှင် ထောင်ဒဏ်သုံးနှစ်အထိ ချမှတ်ခြင်းခံရမည်။

ဒီပုဒ်မနဲ့ စွဲထားတာပါ။ ဒါကို အလေးအနက်ထားနိုင်ဖို့ နိုင်ငံတော် အတိုင်ပင်ခံပုဂ္ဂိုလ်က စေတနာထား ထောက်ပြပေးခဲ့တယ်။ လွယ်လွယ် လက်ညှိုးထိုးအပုဒ်ချ လက်ခုပ်သံတောင်းပြီးပြောနေကြသလို တရားစီရင်ရေးကို ဝင်စွက်ဖက်တာမဟုတ်။ ဖိအားပေးတာ မဟုတ်။ အမှုရင်ဆိုင်ရာမှာ အရေးအကြီးဆုံး ခုခံမှုလမ်းကြောင်း (Defence  Line) ကို တိတိကျကျ ညွှန်ပြပေးခဲ့တာ။ ကျေးဇူးတောင်တင်ရဦးမယ်။

ဘာကြောင့်လဲ။ ဒီပုဒ်မအတွက် အလွန်မတန်အန္တရာယ်ကြီးတဲ့ ဥပဒေသတ်မှတ်ချက်ကို ပုဒ်မခွဲ (၂) မှာ ပြဋ္ဌာန်းထားလို့ပါပဲ။ ကြည့်ပါ- (၂) ဤပုဒ်မအရ ထောင်ဒဏ် ၁၄ နှစ်အထိချမှတ်နိုင်သော ပြစ်မှုတစ်ခုခုစွဲဆိုရာတွင် စွပ်စွဲခံရသူက နိုင်ငံလုံခြုံရေးကိုဖြစ်စေ အကျိုးကိုဖြစ်စေ ထိခိုက်စေရန် ရည်ရွယ်ချက်ကို ထင်ရှားအောင်သက်သေပြရန်မလို။ ထိုသို့ ထိခိုက်စေမည့်ပုံပေါ်လျှင် ထိခိုက်စေသည့်ရည်ရွယ်ချက်ဖြင့် ပြုလုပ်သည်ဟု မှတ်ယူနိုင်ပြီး ပြစ်မှုထင်ရှားစီရင်နိုင်သည်။

ကဲ … သဘောပါပြီလား။ မှတ်ယူနိုင်သည်ဆိုတဲ့ စကားရပ်က ကျယ်ဝန်းသလို အန္တရာယ်လည်းကြီးလှပါတယ်။ ဒါကြောင့် ဒီအမှုက ပေါ့ပေါ့ဆဆခုခံလို့မရဘဲ စွပ်စွဲချက်ကို ကျူးလွန်ခြင်းမရှိကြောင်း ခိုင်ခိုင်လုံလုံခြေခြေမြစ်မြစ် သက်သေပြဖို့ လိုသလို ကိုယ့်တင်ပြချက်ကို တရားရုံးက လက်ခံအောင်လည်း တင်ပြနိုင်ဖို့လိုပါတယ်။ ဒီအမှုက ဆက်သွယ်ရေးဥပဒေပုဒ်မ ၆၆ (ဃ) လို ပါချည်ပါချဲ့မဟုတ်ဘဲနိုင်ငံတော်ကိုဆန့်ကျင်ပြီး ရန်သူအတွက် သူလျှိုလုပ်တယ်လို့ စွပ်စွဲထားတာဖြစ်လို့ ခုခံသူတွေဘက်က လေးလေးစားစား အလုပ်လုပ်ဖို့ လိုပါတယ်။ ပေါ့ဆရင် ကြားက ကိုဝလုံးတို့ ခံရပါလိမ့်မယ်။

စွပ်စွဲသူဘက်က တာဝန်ကျေသလား။ ဒီပုဒ်မအရ အပြစ်ပေးနိုင်ဖို့ တရားစွဲ အဖွဲ့အစည်း (နိုင်ငံတော်) ဘက်က အချက်သုံးချက်ကို အထင်အရှား သက်သေပြနိုင်ရပါမယ်။ (၁) သတင်းသမားနှစ်ဦးက သူလျှိုအဖြစ် အလုပ်လုပ်ပေးခဲ့တဲ့ ‘ရန်သူ’ ဆိုတာ ဘယ်နိုင်ငံလဲ ဘယ်အဖွဲ့အစည်းလဲ။ ရန်သူအဖြစ် ဘယ်သူက သတ်မှတ်တာလဲ။ အစိုးရရဲ့တရားဝင် သတ်မှတ်ချက်ဖြစ်သလား။ တရားရုံးရှေ့မှာ ရန်သူဆိုတာ ဘယ်သူလဲ ထင်ထင်ရှားရှား ပေါ်ပေါက်သလား။ သက်သေအခိုင်အလုံ တင်ပြရပါမယ်။ အနိမ့်ဆုံးပြည်ထဲရေးဌာနအတွင်းဝန်အဆင့်က ထွက်ဆိုပေးဖို့လိုသလို စာမှတ်စာတမ်း ခိုင်ခိုင်လုံလုံတင်ပြနိုင်ဖို့ လိုပါတယ်။

(၂) သတင်းထောက်နှစ်ဦးဟာ ရန်သူရဲ့ ‘သူလျှို’ ဖြစ်ကြောင်း ခိုင်လုံတဲ့ အထောက်အထားတွေ တရားရုံးရှေ့ကို တင်ပြရပါလိမ့်မယ်။ ရန်သူနဲ့ သူတို့ရဲ့ ဆက်သွယ်ရေး ဆက်ဆံရေးအထောက် အပံ့သတင်းပေးပို့တဲ့စနစ် ယခင်အလားတူဆောင်ရွက်ဖူးတဲ့ ပြစ်မှုမှတ်တမ်း စသည် စသည် ထင်ရှားအောင် တင်ပြရပါမယ်။ ထင်ကြေးနဲ့ စွပ်စွဲပြီးအပြစ်ပေးလို့မရပါ။

ဒီပုဒ်မအရ ရန်သူအတွက် သူလျှိုလုပ်တယ်ဆိုတဲ့ စွဲချက်ကကြီးမားလွန်းတဲ့ အတွက် –
(က) နိုင်ငံတော်သမ္မတရုံး
(ခ) ကာကွယ်ရေးဝန်ကြီးဌာန
(ဂ) ပြည်ထဲရေးဝန်ကြီးဌာန
(ဃ)ပြန်ကြားရေးဝန်ကြီးဌာန
(င) သတင်းမီဒီယာကောင်စီ စတဲ့ စပ်ဆိုင်တဲ့ဌာနများရဲ့ သဘောထားမှတ်ချက်ကို အမှုစစ်တရားရုံးက တောင်းခံရယူပြီး ထည့်သွင်းသုံးသပ်ဖို့လိုပါတယ်။ အနာဂတ်သတင်းမီဒီယာလုပ်ငန်းအတွက် သတင်းထောက်နဲ့ သူလျှိုသတင်းထောက်လှမ်းခြင်းနဲ့ သူလျှိုလုပ်ခြင်းကို ဒီအမှုက ကွဲကွဲပြားပြားဖြစ်အောင် ဆုံးဖြတ်ပေးမယ့် စီရင်ထုံးဖြစ်မှာမို့ သက်သေအထောက်အထား ပြည့်စုံခိုင်မာဖို့ သိပ်လိုအပ်ပါတယ်။

(၃) သတင်းထောက်နှစ်ဦးကို ပုဒ်မ ၃ (၁) (ဂ) အရ တရားစွဲသလို သတင်းထောက်တွေကို ဆက်သွယ်ကြားသိစေတဲ့ ရဲတပ်ဖွဲ့ဝင်တွေကိုရော ပုဒ်မ ၅ (၁) (က) အရ တရားစွဲထားသလား ထင်ရှားစေရပါမယ်။သတင်းပေးသူကို အရေးမယူဘဲ သတင်းယူသူကိုပဲ သူလျှိုစွပ် စွဲပြီး တစ်ဖက်သတ်အပြစ်ပေးလို့ မရပါဘူး။

ဒီအဓိကအချက်တွေကို စွပ်စွဲသူဘက်က တာဝန်ကျေသလားဆိုတာ အမှုစစ်တရားရုံးက သုံးသပ်မှာဖြစ်ပါတယ်။စွပ်စွဲခံရသူဘက်က တာဝန်ကျေသလား။ ဒီအမှုဟာ ပုဒ်မ၃ (၂) ပြဋ္ဌာန်းချက်အရ တရားစွဲ အဖွဲ့အစည်းဘက်ကပဲ သက်သေပြရမယ်လို့ခုခံလို့မရပါ။ ခုခံသူများဘက်ကလည်း သတင်းထောက်နှစ်ဦးဟာ သတင်းထောက်ဖြစ်ကြောင်း သူလျှိုမဟုတ်ကြောင်း သတင်းစုံစမ်းခြင်းသာဖြစ်ပြီး သူလျှိုလုပ်ခြင်း မဟုတ်ကြောင်း အခိုင်အမာသက်သေပြဖို့ လိုအပ်ပါတယ်။

(၁) သတင်းထောက်နှစ်ဦးဟာ ရိုက်တာသတင်းဌာနက တရားဝင်ခန့်အပ်ထားတဲ့ သတင်းထောက်များ ဖြစ်တယ်။
(၂) အင်းဒင်သတင်းတစ်ခုတည်း မဟုတ်ဘဲ ရခိုင်မြောက်ပိုင်းသတင်းတွေက်ို အဆက်မပြတ်သတင်း စုံစမ်းရေးသားဖော်ပြခဲ့တယ်။ 
(၃) အင်းဒင်သတင်းကို သတင်းဌာနရဲ့ တာဝန်ပေးမှုအရ သတင်းဌာနအစီအစဉ်ဖြင့် တရားဝင်ရယူခဲ့တယ်။(သတင်းရယူပုံနည်းလမ်းကဥပဒေနဲ့ မညီညွတ်ရင် သတင်းဌာနနဲ့ မြန်မာနိုင်ငံဆိုင်ရာ ရိုက်တာသတင်းဌာနအကြီးအကဲကိုပဲ တိုက်ရိုက်တရားစွဲရမှာဖြစ်ပါတယ်။)
(၄) ရိုက်တာသတင်းဌာနဟာ မြန်မာနိုင်ငံအစိုးရရဲ့ ရန်သူမဟုတ်သလို ရိုက်တာသတင်းဌာန သတင်းထောက်အဖြစ် တရားဝင် သတင်းစုံစမ်းရယူခြင်းဟာလည်း သူလျှိုလုပ်ခြင်းမဟုတ်ဘူး။ 
(၅) အင်းဒင်သတင်းကို ရိုက်တာသတင်းဌာနက ကိုဝလုံးအမည်ဖြင့် အများပြည်သူသိအောင် ကမ္ဘာသိအောင် တရားဝင်ထုတ်ပြန်ဖော်ပြခဲ့တယ်။ ဘယ်ရန်သူနိုင်ငံ ရန်သူအဖွဲ့အစည်းကိုမှ ရောင်းချခြင်း လွှဲပြောင်းပေးခြင်းမရှိခဲ့ဘူး။
(၆) ပြစ်မှုမြောက်စေမယ့် စာမှတ်စာတမ်းများကို ပြစ်မှုမြောက်စေသော စာမှတ်စာတမ်းများအဖြစ် အတိအလင်းသိရှိပါလျက် ပြစ်မှုဖြင့်ထောင်ချောက်ဆင်ဖမ်းဆီးရန်အကြံဖြင့်ပေးကမ်းရန် ဆက်သွယ်ခြင်း ကမ်းလှမ်းခြင်းခံခဲ့ရပြီးအမှန်တကယ် ထောက်ချောက်ဆင်ဖမ်းဆီးခြင်း ခံခဲ့ရတယ်။
(၇) စွပ်စွဲခံရသူများအားပြစ်မှုဖြင့် အပြစ်ပေးရန် အကြောင်းယုတ္တိနှင့်တကွ ဖြစ်ပေါ်သော ဒွိဟသံသယအကြောင်းခြင်းရာများ (တရားလိုပြသက်သေ ဒုရဲမှူး မိုးရန်နိုင်ရဲ့ထွက်ဆိုချက် ရဲတပ်ကြပ်ကြီး ခင်မောင်လင်းရုံး ရှေ့ရောက်ရန်ပျက်ကွက်ခြင်း ထောင်ချောက်ဆင်ဖမ်းဆီးရန် ညွှန်ကြားသူ ရဲမှူးချုပ်တင်ကိုကိုအား လိုပြသက်သေအဖြစ်တင်ပြရန် ပျက်ကွက်ခြင်း) ဒါတွေကို ခုခံသူများဘက်က ဘယ်လောက်ခုခံတင်ပြနိုင်ခဲ့သလဲကို တရားခွင်မှတ်တမ်းနဲ့ ရုံးရှေ့အစစ်ခံချက်များအရ အမှုစစ်တရားရုံးက သုံးသပ်မှာ ဖြစ်ပါတယ်။

မယောင်ရာဆီလူး သင်္ကြန်အမြောက်သံများ
ဒီအမှုက အများစိတ်ဝင်စားတဲ့အတွက် ဝေဖန်သံလည်း အတော်ညံပါတယ်။ တရားစီရင်မှုအပေါ် အကျိုးသက်ရောက်မှုမရှိနိုင်ဘဲ လွဲနေတဲ့မှတ်ချက်အချို့ကိုလည်း ပြောချင်ပါတယ်။

လက်ရှိစွဲထားတဲ့ဥပဒေက ခေတ်မမီဘူး။ ဒီဥပဒေနဲ့ မစွဲသင့်ဘူးတဲ့။ ဒါ လုံးလုံးမှားပါတယ်။ ဥပဒေဆိုတာ အာဏာတည်ဆဲ ဟုတ် မဟုတ်က အဓိကအချက်ပါ။ ဥပဒေနယ်ပယ်မှာ ခေတ်မီတယ် ခေတ်မမီဘူး အသုံးအနှုန်း လုံးဝမရှိပါဘူး။ဒါဆို ၁၉ ရာစုအတွင်းက အတည်ပြု ပြဋ္ဌာန်းခဲ့ပြီး ဒီနေ့အထိအာဏာတည်ဆဲဖြစ်တဲ့ ရာဇသတ်ကြီးတို့၊ ရာဇဝတ်ကျင့်ထုံး ဥပဒေတို့၊ သက်သေခံအက်ဥပဒေတို့၊ တရားမဥပဒေတို့ စတဲ့ အဓိကရ ဥပဒေကြီးတွေကို မသုံးရတော့ဘူးလား။ အဲလိုတွေးရင် ရှင်းသွားတာပါပဲ။

နောက် ကိုလိုနီခေတ်ကဥပဒေနဲ့ စွဲလို့မှားသတဲ့။ ခက်တယ်နော်။ ဘယ်ခေတ်က ဘယ်အစိုးရကရေးဆွဲခဲ့သည်ဖြစ်စေ တည်ဆဲဥပဒေမှန်ရင် ဥပဒေအာနိသင်ရှိပါတယ်။ လိုက်နာကြရမှာပါပဲ။

နောက် သတင်းမီဒီယာဥပဒေနဲ့ပဲ စွဲသင့်တယ်တဲ့။ ဒါက ဥပဒေအသိုင်းအဝိုင်းက ထွက်လာတာပါ။

၁၉၇၃ ခုနှစ် စကားရပ်များအနက် အဓိပ္ပာယ်ဖွင့်ဆိုရေးဥပဒေ ပုဒ်မ ၃ (ဆ) ကို ကိုးကားပြီးပြောကြတာပါ။

အဲဒီပုဒ်မမှာ ‘ရှေးဦးကျသော ဥပဒေပြဋ္ဌာန်းချက်တစ်ရပ်နှင့် နောက်ကျသော ဥပဒေပြဋ္ဌာန်းချက်တစ်ရပ်တို့ ကွဲလွဲဆန့်ကျင်နေပါက နောက်ကျသောဥပဒေ ပြဋ္ဌာန်းချက်သည် အတည်ဖြစ်သည်’ လို့ ပြဋ္ဌာန်းထားပါတယ်။ ဒီအမှုက သတင်းထောက်ကို သတင်းကျင့်ဝတ်အရ စွဲတာ မဟုတ်ဘဲ သူလျှိုလုပ်မှုနဲ့ စွဲထားတာဖြစ်လို့ ဥပဒေနှစ်ရပ် ကွဲလွဲမှုမရှိပါဘူး။သတင်းမီဒီယာဥပဒေမှာ သူလျှိုလုပ်မှုနဲ့ ပတ်သက်တဲ့ပြဋ္ဌာန်းချက်တွေ မပါဝင်ပါဘူး။

လွတ်လပ်သောတရားစီရင်ရေး
တရားရုံး တရားစီရင်ရေးဆိုတာ တရားရုံးရှေ့ စစ်ဆေးပေါ်ပေါက်ချက်တွေ လူပုဂ္ဂိုလ်ပစ္စည်း စာမှတ်စာတမ်းသက်သေခံချက်တွေအရ ဥပဒေနဲ့အညီ စီရင်ဆုံးဖြတ်ရတာဖြစ်ပါတယ်။ တရားခွင်ပြင်က ဖန်တီးမှုများနဲ့ တရားရုံးကို ဖိအားမပေးသင့်ဘူး။ ထိရောက်အသုံးဝင်မှာလည်း မဟုတ်ဘူး။

ဘေးထွက်ဆိုးကျိုးတွေပဲ ဖြစ်စေပါလိမ့်မယ်။

အထူးသဖြင့် နိုင်ငံခြားသံတမန်တွေက သံတမန်ကျင့်ဝတ်ကိုဘေးချပြီး ကိုယ့်နိုင်ငံရဲ့ အချုပ်အခြာအာဏာကို ပြောင်ပြောင်တင်းတင်း ထိပါးနေတာကို လက်ခုပ်တီးပြီး အားရမနေသင့်ဘူးလို့မြင်ပါတယ်။

ရိုက်တာသတင်းဌာနအနေနဲ့လည်း သတင်းထောက်နှစ်ဦးကို ကွင်းလုံးကျွတ်လွှတ်ပေးဖို့ တောင်းဆိုနေမယ့်အစား ဒီစွပ်စွဲချက်တွေဟာ ကိုဝလုံးတို့ သတင်းထောက်နှစ်ဦးနဲ့မဆိုင်ဘူး။ ဖြေရှင်းရမယ့် တာဝန်ဟာ ရိုက်တာသတင်းဌာနနဲ့ပဲ ဆိုင်တယ်။ ဒါကြောင့် အမှုကနေ သတင်းထောက်တွေကိုလွှတ်ပေးပါ။ သတင်းဌာနကိုပဲ တရားစွဲပါ။ ဥပဒေနဲ့အညီဖြေရှင်းဖို့ လိုအပ်တယ်လို့ ပြောင်းလဲတောင်းဆိုသင့်ပါတယ်။

မီဒီယာစစ်ပွဲမဟုတ်
စက်တင်ဘာ ၃ မှာ ဘယ်လိုအမိန့်ချချ ဒါဟာ အစိုးရနဲ့ သတင်းမီဒီယာကြားက မီဒီယာစစ်ပွဲမဟုတ်တာ သေချာပါတယ်။ တရာစီရင်ရေးဆိုင်ရာပြဿနာပဲ ဖြစ်ပါတယ်။ သတင်းကောင်းကြားချင်ကြတာ အားလုံးပါပဲ။ ၀လုံးကလေး ဝိုင်းဝိုင်းရေးပြီးလှပတဲ့ ဇာတ်ပေါင်းခန်းလေးကို မျှော်လင့်ကြတာပါ။

သို့သော် မျှော်လင့်သလိုဖြစ်မလာရင်လည်း ရည်ရွယ်ရာရောက်တဲ့အထိ ဥပဒေနဲ့အညီပဲ ဆက်လက်ခုခံရင်ဆိုင်ကြရမယ့် ကိစ္စဖြစ်ပါတယ်။

အမှန်တရားကိုလိုလားရင် ကျွန်တော်တို့ကိုယ်တိုင် အမှန်တရားနဲ့အတူရပ်တည်နေဖို့လိုအပ်ကြောင်းပါခင်ဗျား။ ။

ဇေယျမင်းသျှင်
၃၁ ဩဂုတ်၊ ၂၀၁၈
The Voice Journal
Share it:

Article

Featured

Opinion

Political

Post A Comment: