မြန်မာနိုင်ငံတွင် ကိုယ်ပိုင်ဂြိုဟ်တု လွှတ်တင်ပါက ကုန်ကျစရိတ် များသည့်အတွက် ကုန်ကျစရိတ် သက်သာသည့် Earth Observation Micro-Satellite အမျိုးအစား ဂြိုဟ်တုလွှတ်တင်နိုင်ရေး ဆောင်ရွက်မည်ဟု ဒုတိယသမ္မတ ပြောကြား

Share it:


မြန်မာနိုင်ငံတွင် ကိုယ်ပိုင်ဂြိုဟ်တု လွှတ်တင်ပါက ကုန်ကျစရိတ် များပြားသည့်အတွက် ပထမအဆင့်အနေဖြင့် ကုန်ကျစရိတ် သက်သာသည့် Earth Observation Micro-Satellite အမျိုးအစား ဂြိုဟ်တုလွှတ်တင်နိုင်ရေး ဆောင်ရွက်မည်ဖြစ်ကြောင်း ဒုတိယသမ္မတ ဦးမြင့်ဆွေက သြဂုတ် ၃၀ ရက်တွင် နေပြည်တော်၌ ပြုလုပ်သည့် မြန်မာနိုင်ငံပိုင်ဂြိုဟ်တု စနစ်တည်ထောင်ရေး ဦးဆောင်ကော်မတီ စတုတ္ထအကြိမ် လုပ်ငန်းညှိနှိုင်း အစည်းအဝေးတွင် တက်ရောက် အမှာစကား ပြောကြားရာ၌ ထည့်သွင်းပြောကြားခဲ့သည်။

မြန်မာနိုင်ငံမှ အလုံးစုံပိုင်ဆိုင်သည့် ကိုယ်ပိုင်ဂြိုဟ်တု လွှတ်တင်မှု ဖြစ်ပါကြောင်း၊ အဆိုပါ အဆင့်ကို အသုံးပြုမည့် ဂြိုဟ်တု Channel များပြားလာသည့် အချိန်နှင့် နည်းပညာ အတွေ့အကြုံများ ကြွယ်ဝပြီး ကိုယ်ပိုင်ထိန်းချုပ်နိုင်သည့် အချိန်တို့တွင် ဆောင်ရွက်သွားရမည် ဖြစ်ပါကြောင်း၊ ကိုယ်ပိုင်ဂြိုဟ်တု လွှတ်တင်ပါက ကုန်ကျစရိတ် များပြားသည့်အတွက် ပထမဦးစားပေး လျာထားမှုအနေဖြင့် ကုန်ကျစရိတ် သက်သာသော Earth Observation Micro-Satellite အမျိုးအစား ဂြိုဟ်တုကို လွှတ်တင်နိုင်ရေးအတွက် ကြိုးစားဆောင်ရွက်ကြရန် လိုအပ်မည်ဖြစ်ပါကြောင်း၊ အဆိုပါ ဂြိုဟ်တုလွှတ်တင်ရေးအတွက် ဂျပန်နိုင်ငံ Hokkaido တက္ကသိုလ်က ကမ်းလှမ်းထားသည်ဟု သိရှိရပါကြောင်း ဒုတိယသမ္မတ ဦးမြင့်ဆွေက ပြောကြားသည်။

ထို့ပြင် Earth Observation Micro-Satellite လွှတ်တင်ရန်အတွက် ဂြိုဟ်တုတွင် တပ်ဆင်အသုံးပြုမည့် Payload Camera နှင့် Sensor များ၏ Specification များကို သတ်မှတ်ပေးရန်အတွက် သက်ဆိုင်ရာ ၀န်ကြီးဌာနများနှင့် ဆွေးနွေးညှိနှိုင်းခဲ့သည်ကို သိရှိရပါကြောင်း၊ အဆိုပါ ဂြိုဟ်တုတွင် တပ်ဆင်မည့် စက်ပစ္စည်းများကို သတ်မှတ်ပြီးပါက ဂျပန်နိုင်ငံ Hokkaido တက္ကသိုလ်သို့ ပြန်လည်ပေးပို့ပြီး ကုန်ကျစရိတ်များကို စိစစ်၍ လိုအပ်သည့် Process များနှင့် အကောင်းဆုံးဖြစ်နိုင်မည့် ငွေပေးချေမှု နည်းလမ်းများကို ရွေးချယ်ကာ ဆောင်ရွက်ကြရန် ဒုတိယသမ္မတက ပြောကြားသည်။

ယင်းအပြင် Space Agency ထူထောင်နိုင်ရေး အတွက်လည်း Space Law များ စုဆောင်းပြင်ဆင်နိုင်ရန်နှင့် Earth Observation Micro-Satellite လွှတ်တင်နိုင်ရေးတို့အတွက် လိုအပ်ပါက ဆပ်ကော်မတီများ ထပ်မံဖွဲ့စည်းသွားရန် လိုအပ်ကြောင်း၊ ယနေ့အစည်းအဝေးကို တက်ရောက်လာကြသည့် ကော်မတီဝင်များ အနေဖြင့် အချိုးကျ ပူးတွဲပိုင်ဆိုင်သော စနစ်ဖြစ်သည့် Myanmar Sat-2 ဂြိုဟ်တုကို အောင်မြင်စွာ ဆောင်ရွက်နိုင်ရန်နှင့် မိမိတို့၏ ရည်မှန်းချက်ဖြစ်သော ကိုယ်ပိုင်ဂြိုဟ်တု လွှတ်တင်နိုင်မည့် နည်းလမ်းများ အတွက် လိုအပ်သော အကြံပြုချက်များကို ပွင့်ပွင့်လင်းလင်း ဆွေးနွေးကြရန် ဒုတိယသမ္မတက ပြောကြားသည်။

September 2, 2018
Share it:

Featured

Japan

Myanmar

News

Satellite

Post A Comment: